کۆمسیۆن: وەرەقەی دەنگدانی گشتی و تایبەت بۆ هەڵبژاردن چاپدەکرێت

PUKMEDIA

دەنگدان

كۆمسیۆنی باڵای سه‌ربه‌خۆی هه‌ڵبژاردنی عیراق وه‌ره‌قه‌ی ده‌نگدانی گشتی و تایبه‌تی بۆ هه‌ڵبژاردنی په‌رله‌مانی كوردستان چاپده‌كات و كاره‌كانی كۆمسیۆنیش بۆ به‌ڕ‌ێوه‌چونی پرۆسه‌كه‌ به‌رده‌وامه‌و وته‌بێژی كۆمسیۆنیش ده‌ڵێت: "سه‌رجه‌م ئاماده‌كارییه‌كان و كاری كۆمسیۆن بۆ هه‌ڵبژاردنی په‌رله‌مانی كوردستان له‌واده‌ی دیاریكراوی خۆیدا به‌رده‌وامه‌".
 

ئاماده‌كارییه‌كان رانه‌گیراوه‌

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ وێبسایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "كۆمسیۆن ئاماده‌كارییه‌كانی بۆ هه‌ڵبژاردنی په‌رله‌مانی كوردستان رانه‌گرتوه‌و به‌رده‌وامه‌، ئۆفیسه‌كانی كۆمسیۆنیش له‌پارێزگاكانی هه‌رێمی كوردستان كاران و رۆژانه‌ كارتی بایۆمه‌تری ده‌نگدان به‌ ده‌نگده‌ران ده‌ده‌نه‌وه‌".

به‌ گوێره‌ی زانیارییه‌كانی  PUKMEDIA كه‌له‌ كۆمسیۆن وه‌ریگرتووه‌ له‌چوار مانگی رابردوودا، 818 هه‌زار و 997 كارتی نوێی بایۆمه‌تری چاپ كراوه‌و له‌و ژماره‌یه‌ش 290 هه‌زار و 653 كارت به‌ ده‌نگده‌ران دراوه‌ته‌وه‌و 528 هه‌زار و 344 كارتیش ماوه‌ كه‌ دابه‌ش بكرێن.
 

زیاتر له‌ 290 هه‌زار كارتی ده‌نگدان دراوه‌ته‌وه‌ به‌ده‌نگده‌ر

وته‌بێژه‌كه‌ی كۆمسیۆن ئاماژه‌ی به‌وه‌شكرد: "له‌ هه‌رێمی كوردستان 173 ناوه‌ندی تۆماركردنی ده‌نگده‌ران هه‌یه‌ و دابه‌شكردنی كارتی ده‌نگدانیش به‌رده‌وامه‌، به‌شێوه‌یه‌ك تا ئێستا له‌ پارێزگای هه‌ولێر 99 هه‌زار و 972 كارت و له‌ پارێزگای سلێمانی 115 هه‌زار و 326 كارت و له‌ پارێزگای دهۆك 75 هه‌زار و 355 كارتی ده‌نگدان به‌ ده‌نگده‌ران دراونه‌ته‌وه‌، كه‌به‌كۆی گشتی ده‌كاته‌ 290 هه‌زار و 653 كارتی ده‌نگدان".

"پێشتر چوار فۆڕ‌می ده‌نگدانی گشتی و فۆڕمێكی ده‌نگدانی تایبه‌ت چاپكراوه‌و له‌ئێستاشدا وه‌ك به‌شێك له‌ئاماده‌كارییه‌كان بۆ ئه‌نجامدانی هه‌ڵبژاردنه‌كانی په‌رله‌مانی كوردستان، كۆمسیۆنی باڵای سه‌ربه‌خۆی هه‌ڵبژاردنه‌كان ده‌ستیكرد به‌چاپكردنی وه‌ره‌قه‌ی ده‌نگدان كه‌ ناوی حزب و هاوپه‌یمانێتییه‌كان و كاندید و ژماره‌كانیانی له‌سه‌ره‌" جومانه‌ غه‌لای واده‌ڵێت.

یه‌كێتی و لایه‌نه‌كان هه‌ڵبژاردنیان ده‌وێت

پێشتر PUKMEDIA له‌ زاری سه‌رچاوه‌یه‌كه‌وه‌ بڵاویكردبوه‌وه‌:"كۆمسیۆنی باڵای سه‌ربه‌خۆی هه‌ڵبژاردنه‌كان به‌رده‌وامه‌ له‌سه‌ر كاره‌كانی خۆیی و ده‌ستیكردوه‌ به‌چاپكردنی وه‌ره‌قه‌ی ده‌نگدانی په‌رله‌مانی كوردستان".
 
ئه‌مه‌ له‌كاتێكدایه‌ به‌پێی مه‌رسومی سه‌رۆكایه‌تی هه‌رێم بڕ‌یاره‌ رۆژی 10ی 6ی 2024 هه‌ڵبژاردنی خولی شه‌شه‌می په‌رله‌مانی كوردستان به‌ڕ‌ێوه‌بچێت و یه‌كێتیی نیشتمانیی كوردستان و لایه‌نه‌ كوردستانییه‌كانی دیكه‌، جگه‌ له‌پارتی دیموكراتی كوردستان ئاماده‌ییان بۆ هه‌ڵبژاردنی په‌رله‌مانی كوردستان له‌و واده‌یه‌دا ده‌ربڕ‌یوه‌و كۆمسیۆنیش ئاماده‌كارییه‌كانی به‌رده‌وامه‌.

PUKMEDIA