وتەبێژی یەکێتی: حکومەت و پەرلەمانێکی کارامان دەوێت

PUKMEDIA

سەعدی ئەحمەد پیرە وتەبێژی یەكێتیی نیشتمانیی كوردستان

کەمێک پێش ئێستا  کۆبوونەوەی ئه‌نجومه‌نی سه‌ركردایه‌تی بە سەرپەرشتی بافڵ جەلال تاڵەبانی سەرۆکی یه‌كێتیی نیشتمانیی کوردستان کۆتاییهات و لەکۆبوونەوەکەدا تەئکید لە ئەنجامدانی هەڵبژاردن لەوادەی خۆیدا کرایەوە، وتەبێژی یەکێتیی نیشتمانیی کوردستانیش رایدەگەیەنێت:"هەرێمی کوردستان پێویستی بە حکومەت و پەرلەمانێکی کارا هەیە".

پاش کۆبوونەوەکەی ئەنجومەنی سەرکردایەتی سەعدی ئەحمەد پیرە وتەبێژی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند:" لەکۆبوونەوەکەدا تەئکید لە هەڵوێستی یەکێتی سەبارەت بە ئەنجامدانی هەلبژاردن لەوادەی خۆیدا کرایەوە و بۆ ئەو مەبەستەش بڕیاردرا، لەپێناو بەدەستهێنانی زۆرترین دەنگ ئەندامانی مەکتەبی سیاسی و سەرکردایەتی بەسەر بازنەکانی هەڵبژاردندا دابەشبکرێن".

وتیشی:" لەئێستادا ناوچەکە بە بارودۆخێکی هەستیاردا تێدەپەڕێت، بۆ ئەمەش پێویستە هەرێمی کوردستان، حکومەت و پەرلەمانێکی کارای هەبێت، کە توانای بەرەنگاربوونەوەی لەگەڵ حاڵەتە نەخوازراوەکاندا هەبێت، لەو روانگەیەشەوە یەکێتیی نیشتمانیی کوردستان تەئکید لە ئەنجامدانی هەڵبژاردن دەکاتەوە".

وتەبێژی یەکێتی ئاماژەی بەوەشکرد:" نەک تەنها یەکێتی بەڵکو زۆربەی حزب و لایەنەکانی دیکەی هەرێم داوای ئەنجامدانی هەڵبژاردن لەوادەی خۆیدا دەکەن، ئەمەش لەکاتێکدایە، هاوپەیمانە نێودەوڵەتییەکانیشمان هەمان داوایان هەیە".

سەعدی ئەحمەد پیرە راشیگەیاند:" حکومەت و پەرلەمانێکی کارا لەهەرێمی کوردستان کاریگەری دەبێت لەسەر بەهێزکردنی پێگەی هەرێم و برەودان بە پەیوەندییەکانمان لەگەڵ بەغدا و وڵاتان، هاوکات دەرگایەک بەڕووی چارەسەری کێشەکان و کەمکردنەوەی قەیرانەکان لەهەرێم دەکاتەوە، پێشمانوایە لەئێستادا هیچ رێگرییەک بۆ ئەنجامدانی هەڵبژاردن نییە و ئەگەر هەڵبژاردن ئەنجام نەدرێت پرۆسەی دیموکراسی لەهەرێم لاوازدەبێت".

بەپێی زانیارییەکانی PUKMEDIA بڕیارە پاش کەمێکی دیکە راگەیەنراوی کۆبونەوەی ئەنجومەنی سەرکردایەتی بڵاوبکرێتەوە.

PUKMEDIA