ژماره‌ به‌هاوپه‌یمانی و حزب و كاندیده‌كان ده‌درێت

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

بڕیاره‌ ئه‌مڕۆ دووشه‌ممه‌ 8-4-2024 كۆمسیۆنی باڵای سه‌ربه‌خۆی هه‌ڵبژاردنه‌كانی عیراق تیروپشك بۆ پێدانی ژماره‌ به‌هاوپه‌یمانی و حزب و كاندیده‌ سه‌ربه‌خۆكان بكات كه‌ به‌شداری له‌هه‌ڵبژاردنی خولی شه‌شه‌می په‌رله‌مانی كوردستان دا ده‌كه‌ن.

به‌گوێره‌ی راگه‌یه‌ندراوێكی كۆمسیۆنه‌كه‌ كه‌ بۆ PUKMEDIA نێردراوه‌، ته‌ئكید ده‌كاته‌وه‌ كه‌ "ئه‌مڕۆ تیروپشكه‌كه‌ له‌سه‌عات 11:00ی پێشنیوه‌ڕ‌ۆ له‌باره‌گای كۆمسیۆنه‌كه‌ له‌ به‌غدا بۆ ژماره‌ی كاندید و حزب و هاوپه‌یمانییه‌كان ده‌كرێت".

كۆمسیۆن به‌رده‌وامه‌ له‌ئاماده‌كاری بۆ هه‌ڵبژاردن

هاوكات جومانه‌ غه‌لای وته‌بێژی ره‌سمی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌ PUKMEDIA ی راگه‌یاند: "رێكار و هه‌نگاوه‌كانی كۆمسیۆنی سه‌ربه‌خۆی هه‌ڵبژاردنه‌كان بۆ به‌ڕ‌ێوه‌بردنی هه‌ڵبژاردنی په‌رله‌مانی كوردستان به‌رده‌وامه‌و قۆناغ به‌ قۆناغ كاره‌كانی پرۆسه‌كه‌ جێبه‌جێده‌كرێن".

"بۆ هه‌ڵبژاردنی په‌رله‌مانی كوردستان دوو هاوپه‌یمانێتی و 20 حزب و 60 كاندیدی سه‌ربه‌خۆ ناویان تۆمار كردووه‌، كه‌له‌ ژماره‌ 101 وه‌ ده‌ستده‌كرێت به‌ تیروپشكی ژماره‌كان به‌ هاوپه‌یمانی و لیست و كاندیده‌ سه‌ربه‌خۆكان".

كۆمسیۆن سه‌ربه‌خۆیی خۆی پاراستووه‌

كۆمسیۆن پابه‌نده‌ به‌خشته‌ی كاتی به‌ڕ‌ێوه‌چونی پرۆسه‌ی هه‌ڵبژاردن له‌ واده‌ی خۆیداو سه‌ربه‌خۆیی خۆی له‌نێوان حزب و هاوپه‌یمانێتییه‌كاندا پاراستوه‌و به‌پێی یاسا و بڕ‌یاره‌كان كاره‌كانی هه‌ڵبژاردنی خولی شه‌شه‌می په‌رله‌مانی كوردستان جێبه‌جێ ده‌كات.

سه‌رۆكی هه‌رێمی كوردستان به‌ مه‌رسومێك رۆژی 10ی 6ی2024 ی بۆ هه‌ڵبژاردنی په‌رله‌مانی كوردستان دیاریكرد.
هه‌ڵبژاردنه‌كه‌ به‌سیستمی فره‌ بازنه‌یی به‌ڕ‌ێوه‌ده‌چێت كه‌ هه‌رێم به‌سه‌ر 4 بازنه‌ی سلێمانی، هه‌ڵه‌بجه‌، هه‌ولێر و دهۆك دا دابه‌شكراوه‌و كورسی په‌رله‌مانیش 100 كورسیه‌.

سه‌رۆك بافڵ: هه‌ڵبژاردن دواناخرێت

نوێترین لێدوانیش له‌سه‌ر پێشهاته‌كانی پڕ‌ۆسه‌كه‌ له‌سه‌ر زاری سه‌رۆك بافڵ سه‌رۆكی یه‌كێتیی نیشتمانیی كوردستانه‌وه‌ بوو كه‌له‌ به‌غداوه‌ رایگه‌یاند:" هه‌ڵبژاردن دواناخرێت و له‌واده‌ی خۆیدا ده‌كرێت".

هاوكات نێچیرڤان بارزانی سه‌رۆكی هه‌رێمی كوردستانیش له‌ لێدوانێكدا له‌سه‌ر هه‌مان پرس به‌ كه‌ناڵه‌كانی راگه‌یاندنی وت:" هه‌ڵبژاردن له‌واده‌ی خۆیدا ده‌كرێت".
 PUKMEDIA