سبەی کۆمسیۆن ژمارە بە حزب و کاندیدەکانی هەڵبژاردن دەدات

PUKMEDIA

پەرلەمانی کوردستان

کۆمسیۆنی باڵای سەربەخۆیی هەڵبژاردنەکانی عێراق رایدەگەیەنێت:" سبەی دووشەممە تیروپشک بۆ پێدانی ژمارە بە هاوپەیمانی و حزب و کاندیدکان دەکات کە بەشداری لە هەڵبژاردنی خولی شەشەمی پەرلەمانی کوردستان دا دەکەن".

بەگوێرەی راگەیەندراوێکی کۆمسیۆنەکە کە بۆ PUKMEDIA نێردراوە، تەئکید دەکاتەوە کە سبەی 8ی 4ی 2024 تیروپشک بۆ ژمارەی کاندید و حزب و هاوپەیمانییەکان دەکرێت". 

تیروپشکەکە سەعات 11:00ی پێشنیوەڕۆ لە بارەگای کۆمسیۆنەکە لە بەغدا دەکرێت.

جومانە غەلای وتەبێژی رەسمی کۆمسیۆنی باڵای سەربەخۆی هەڵبژاردنەکانی عیراق بە PUKMEDIA ی راگەیاند: "رێکار و هەنگاوەکانی کۆمسیۆنی سەربەخۆی هەڵبژاردنەکان بۆ بەڕێوەبردنی هەڵبژاردنی پەرلەمانی کوردستان بەردەوامە و قۆناغ بە قۆناغ کارەکانی پرۆسەکە جێبەجێدەکرێن".

سەرۆکی هەرێمی کوردستان بە مەرسومێک رۆژی 10ی 6ی2ی2024 ی بۆ هەڵبژاردنی پەرلەمانی کوردستان دیاریکرد.

لەو پرۆسەیەدا 20 حزب و 2 هاوپەیمانی و نزیکەی 60 کاندیدی سەریەخۆ ناویان تۆمارکردوە.

هەڵبژاردنەکە بەسیستمی فرە بازنەیی بەڕێوەدەچێت کە هەرێم بەسەر 4 بازنەی سلێمانی، هەڵەبجە، هەولێر و دهۆک دا دابەشکراوە و کورسی پەرلەمانیش 100 کورسیە.

نوێترین لێدوانیش لەسەر پێشهاتەکانی پڕۆسەکە لەسەر زاری سەرۆک بافڵ سەرۆکی یەکێتیی نیشتمانیی کوردستانەوە بوو کە لە بەغداوە رایگەیاند: "هەڵبژاردن دواناخرێت و لەوادەی خۆیدا دەکرێت".

 بەهەمان شێوە نێچیرڤان بارزانی سەرۆکی هەرێمی کوردستانیش لە لێدوانێکدا لەسەر هەمان پرس بە کەناڵەکانی راگەیاندنی وت: "هەڵبژاردن لەوادەی خۆیدا دەکرێت".

 PUKMEDIA