دارایی عیراق تەواوی بودجەی مووچەخۆرانی هەرێمی نارد

PUKMEDIA

مووچەی فەرمانبەران

وەزارەتی دارایی عیراق لە یەک رۆژدا 820 ملیار و 109 ملیۆن دیناری بە دوو جار خستەسەر هەژماری وەزارەتی دارایی حکومەتی هەرێم، تاوەکوو مووچەی مانگی 3ی ئەمساڵ پێش جەژنی رەمەزان بە مووچەخۆرانی هەرێم بدرێت و وەزارەتی دارایی هەرێمیش دوپاتیکردەوە: "کە لەئێستادا تەواوی تەمویلی مووچەی فەرمانبەرانی هەرێم لەلایەن عیراقەوە نێردراوە".

وەزارەتی دارایی عیراق رۆژی یەکشەممە 7-4-2024 بڕی 390 ملیار دیناری دیکەی رەوانەی هەرێم کرد و پێشتریش بڕی 430 ملیار و 109 ملیۆن دیناری بۆ مووچەی فەرمانبەرانی هەرێم  نارد.

لە راگەیەندراوێكی وەزارەتی دارایی هەرێم كە 7ی 4 بڵاویكردەوە دەڵێت::" 390 ملیار دیناری دیكە خراوەتە سەر هەژماری هەرێم و  ئێستا  تەواوی تەمویلی مووچەی مانگی (3)ی فەرمانبەران لە عیراقەوە رەوانەكراوە".

بەگوێرەی بەدواداچوونی PUKMEDIA تائێستا بڕی 820 ملیار دینار و 109 ملیۆن دینار لەلایەن وەزارەتی دارایی عیراقەوە بۆ مووچەی مووچەخۆران بۆ مانگی ئادار نێردراوە و بەپێی لیستی مووچەی مانگی 3 كە وەزارەتی دارایی حكومەتی هەرێم بڵاویكردۆتەوە، بەر لە جەژن مووچەی تەواوی وەزارەت و دەستەو دامەزراوەكانی حكومەتی هەرێم دابەشدەكرێت.

لە راگەیەنراوی وەزارەتی دارایی  تەئكیدكراوەتەوەكە سەرجەم فەرمانبەر  و موچەخۆرانی شارستانی و سەربازی كە پێش جەژن موچەكانیان وەردەگرن.


بەگوێرەی لیستەكەش سبەینێ دووشەممە 26 وەزارەت و دەستە و سەرۆکایەتیەکانی پەرلەمان و هەرێم و ئەنجومەنی وەزیران مووچەی مانگی ئادار وەردەگرن.

رۆژی پێنجشەممە 5-4-2024 وەزارەتی دارایی عیراق بڕی 130 ملیار دیناری خستوەتە سەر هەژماری وەزارەتی دارایی حکومەتی هەرێمی کوردستان بۆ دابەشکردنی مووچەی مانگی ئادار، ئەمە لەکاتێکدایە کە بە دوو جار بڕی 820 ملیار و 109 ملیۆن دیناری دیکەی لە ئەمڕۆدا ناردووە، کە تێکڕا بۆ مووچەی مانگی ئادار وەزارەتی دارایی عیراق 950 ملیار و 109 ملیۆن دیناری بۆ مووچەی مانگی ئاداری فەرمانبەرانی هەرێم نارد.

ئەمە لەكاتێكدایە كە مووچەی مانگی شوباتی ئەمساڵ بەهۆی دەستبەسەركردن و دواكەوتن و ماوەی دابەشكردنی زیاتر لە دوومانگی خایاند.


PUKMEDIA