ئەمریکا: هەڵبژاردن قەوارەی هەرێم دەپارێزێت

PUKMEDIA

دارا خەیلانی و پامێلا جەی هاک

لێپرسراوی پەیوەندییەکانی دەرەوە: یەکێتی پێداگرە لەبەڕێوەچونی هەڵبژاردن

یەکێتیی نیشتمانیی کوردستان تەئکید لە هەڵبژاردنی پەرلەمانی کوردستان لە وادەی خۆیدا دەکاتەوەو جێگری کونسوڵی گشتی ئەمریکاش لە هەرێمی کوردستان دەڵێت: "ویلایەتە یەکگرتووەکان پشتگیری ئەنجامدانی هەڵبژاردن لە هەرێم دەکات".

ئەمڕۆ ۲٠۲٤/٤/۲ ، دارا خەیلانی ئەندامی سەرکردایەتی و لێپرسراوی پەیوەندییەکانی دەرەوەی یەکێتیی نیشتمانیی کوردستان، لە مەکتەبی سیاسی لە هەولێر، پێشوازی کرد لە پامێلا جەی هاک جێگری کونسوڵی گشتی ئەمریکا لە هەرێمی کوردستان و لە دیدارێکدا دواین گۆڕانکارییەکانی ئێستای هەرێمی کوردستان و ئامادەکارییەکان بۆ هەڵبژاردنی پەرلەمانی کوردستان گفتووگۆی لە بارەوە کرا.

دارا خەیلانی هەڵوێستی یەکێتیی نیشتمانی کوردستانی ڕوونکردەوە رایگەیاند: "یەکێتی پێداگرە لە بەڕێوەچونی هەڵبژاردنێکی پاک و بێگەرد و ئامادەی ھەڵبژاردنە لە وادەی دیاریکراودا کە سەرۆکی ھەرێم دیاریکردوە ، بەهیچ شێوەیەک لەگەڵ دواخستنی وادەی هەڵبژاردن نین و پێمان خۆشە هەموو هێز و لایەنە سیاسییەکانی کوردستان بەشداری لە هەڵبژاردنەکەدا بکەن".

"هاوکات هەڵبژاردن خواستی کۆمەڵانی خەڵکی کوردستانە کە حکومەتێک و پەرلەمانێکی هەبێت کە نوێنەرایەتی تەواوی کۆمەڵانی خەڵكی کوردستان بکات بەبێ جیاوازی"، دارا خەیلانی وای وت.

لەبەرامبەردا پامێلا جەی هاک جێگری کونسوڵی گشتی ئەمریکا لە هەرێمی کوردستان ئاماژەی بەوەدا: "ویلایەتە یەکگرتووەکانی ئەمریکا پشتگیری لە هەڵبژاردنێکی ئازاد و شەفاف و دادپەروەر لە هەرێمی کوردستان دەکات و بە پڕۆسەیەکی گرنگ بۆ خزمەتکردنی کۆمەڵانی خەڵک و پاراستنی قەوارەی هەرێم دەزانێت".

PUKMEDIA