سەرۆكکۆمار: خەڵکی خورماتوو رۆڵی کاریگەریان لەبەرەنگاربوونەوەی تیرۆردا هەبووە

PUKMEDIA

پێشوازی سەرۆککۆمار لەنوێنەرانی خەڵکی خورماتوو

د.لەتیف جەمال رەشید سەرۆك کۆماری عیراق بە ئامادەبوونی کەریم شکور محەمەد جێگری سەرۆکی لیژنەی دەستپاکی لە ئەنجومەنی نوێنەران، پێشوازیکرد لە وەفدێکی خەڵکی قەزای خورماتوو .

لە دیدارەکەدا کە ئەمڕۆ یەکشەممە 31-3-2024 لە کۆشکی سەلام لە بەغداد بەڕێوەچوو، بارودۆخی قەزای خورماتوو تاووتوێ کرا و سەرۆكکۆمار جەختیکردەوە لەسەر پێویستی بەرقەرارکردنی سەقامگیری و ئاسایش لە شارەکە و هەروەها  دابینکردنی سەرجەم پێداویستی خزمەتگوزاری و بژێوی بۆ دانیشتوانی قەزاکە و جێبەجێکردنی داواکاری و پێداویستییەکانیان و ئاماژەی بەوەشکرد، خەڵکی خورماتوو لە بەرەنگاربوونەوەی تیرۆر و پاراستنی پێکەوەژیانی ئاشتیانە هەڵوێستی بەرچاو و دیاریان هەبووە، چەندین ساڵیشە بەدەست ئاڵنگاری و کێشەوە دەناڵێنن، کە دەبێت چارەسەر بکرێن.

لای خۆیانەوە ئەندامانی وەفدەکە رونکردنەوەیەکیان پێشکەش بە سەرۆك کۆمار کرد سەبارەت بە دۆخی خورماتو و بارودۆخی خەڵکەکەی، هاوکات بەشێک لەو کێشە و گرفتانەی روبەڕوویان بووەتەوە خستەڕوو، لەوبارەیەوە سەرۆكکۆمار پشتیوانی خۆی بۆ خەڵکی شارەکە و چارەسەرکردنی کێشە هەڵپەسێردراوەکان دووپاتکردەوە.

PUKMEDIA