کۆمسیۆن: زۆربەی حزب و هاوپەیمانێتییەکان کاندیدیان بۆ هەڵبژاردن پێشکەش نەکردووە

PUKMEDIA

پەرلەمانی کوردستان

هەتا ئێستا تەنها 36 کاندیدی سەربەخۆ ناویان بۆ هەڵبژاردنی پەرلەمانی کوردستان پێشکەش کردووەو وادەی ناوتۆمارکردنیش تەنها دوو رۆژی ماوە، ئەمەش لەکاتێکدایە کۆمسیۆن لەکار و ئامادەکارییەکانی بۆ بەڕێووەچونی پرۆسەی هەڵبژاردنی پەرلەمانی کوردستان بەردەوامە و ئاماژە بەوەدەکات: "بایکۆتکردنی هیچ حزب و لایەنێک کاریگەری لەسەر دواکەوتنی پرۆسەکە نابێت".

تەنها 2 حزب و 3 هاوپەیمانێتی کاندیدیان پێشکەش کردووە

عیماد جەمیل سەرۆکی تیمی راگەیاندنی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمی یەکێتیی نیشتمانیی کوردستان PUKMEDIA ی راگەیاند: "هەتا ئێستا تەنها 36 کاندیدی سەربەخۆ ناویان بۆ بەشداریکردن لە هەڵبژاردنی پەرلەمانی کوردستان پێشکەش بە کۆمسیۆن کردووە و کۆتا وادەش بۆ وەرگرتنی ناوی کاندیدان رۆژی پێنج شەممە 28-3-2024 یەو درێژناکرێتەوە".

"بەپێی ئەو ئامارانەی هەتا ئێستا لەبەردەستدایە لە هەولێر 11 کاندید و لە سلێمانی 13 کاندید و لە دهۆکیش 12 کاندید خۆیان تۆمار کردووەو هاوکات تەنها 2 حزب لە دهۆک و سلێمانی کاندیدانیان پێشکەش کردووەو 3 هاوپەیمانێتیش لە سلێمانی و دهۆک و هەڵەبجە ناوی کاندیدەکانیان پێشکەش بە کۆمسیۆن کردووە"، عیماد جەمیل وای وت.

بایکۆتکردنی هیچ حزبێک پرۆسەکە دواناخات

سەرۆکی تیمی راگەیاندنی کۆمسیۆن ئاماژەی بەوەشکرد: "هیچ پلانێک نییە بۆ دواخستنی پرۆسەی هەڵبژاردنی پەرلەمانی کوردستان و هەر حزب و لایەنێکیش بایکۆتی پرۆسەکە بکات کاریگەری لەسەر پرۆسەکە دروست ناکات، وەک چۆن لە هەڵبژاردنی ئەنجومەنی پارێزگاکانی عیراق حزب و لایەن هەبوون بایکۆتی هەڵبژاردنیان کرد و هیچ کاریگەرییەکیشی لەسەر بەڕێوەچوونی پرۆسەکە نەبوو".

وتیشی: "تیمەکانی کۆمسیۆن بەردەوامن لە کارکردن و ئامادەکارییەکان بۆ هەڵبژاردن لە وادەی خۆیدا کە 10ی حوزەیرانی ئەمساڵە".

20 حزب و 2 هاوپەیمانێتی و 62 کاندیدی سەربەخۆ بەشداردەبن

بۆ هەڵبژاردنی پەرلەمانی کوردستان تێکڕا 20 حزب و 2 هاوپەیمانێتی و 62 کاندیدی سەربەخۆ بۆ بەشداریکردن لە پرۆسەکە تۆمارکراون، کە لەبازنەکانی هەڵبژاردن بەشداردەبن، بەکۆی گشتیش لە هەرێمی کوردستان 3 ملیۆن و 789 هەزار و 360 دەنگدەر هەن، لەو ژمارەیەش زیاتر لە 2 ملیۆن 900 هەزار دەنگدەر ناوی خۆیان لە تۆماری بایۆمەتری تۆمارکردووە و ئامادەن بەشداری هەڵبژاردن بکەن.

یەکێتیی نیشتمانیی کوردستان یەکێکە لەو 22 حزب و هاوپەیمانێتییەی ، کە بەلیستی سەربەخۆ لەهەر چوار بازنەکەی کوردستان بەشداری لەهەڵبژاردنی داهاتووی پەرلەمانی کوردستاندا دەکات و بەوتەی رزگار حاجی حەمە لێپرسراوی مەکتەبی هەڵبژاردنی یەکێتیش: "سەرجەم ئامادەکارییەکانیان بۆ بەشداریکردن لەهەڵبژاردن ئەنجامدراوەو یەکێتیی نیشتمانیی کوردستان بۆ بەشداریکردن لە هەڵبژاردن ئامادەیە".

PUKMEDIA