كۆمسیۆن هاوپەیمانی و حزب و كاندیدەكانی هەرێم ئاگادار دەكاتەوە

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکانی عیراق

سێ رۆژی دیكە وادەی وەرگرتنی لیستی هاوپەیمانێتی و حزب و كاندیدەكان بۆ هەڵبژاردنی پەرلەمانی كوردستانی رۆژی 10/6ی ئەمساڵ، لەلایەن كۆمیسیۆنی باڵای سەربەخۆی هەڵبژاردنەكانی عیراقەوە كۆتایی دێت كە رۆژی پێنجشەممە 28/3/2024 یە.

كۆمیسیۆن لە ئاگادارییەكدا رایدەگەیەنێت:"كۆتا وادەی وەرگرتنی لیستی كاندید، هاوپەیمانی، حزبی سیاسی و كەسایەتییەكان تا رۆژی پێنجشەممەی داهاتوە و  28ـی ئازاری 2024ە، ئەو وادەیەش درێژناكرێتەوە، ئەوەش بەگوێرەی رێنماییەكانی هەڵبژاردنی پەرلەمانی كوردستان".

جومانە غەلای وتەبێژی كۆمسیۆنەكەش لە لێدوانێكیدا بۆ وێبسایتی رەسمی یەکێتیی نیشتمانیی کوردستان PUKMEDIA رایدەگەیەنێت: "ئەنجومەنی کۆمسیاران بڕیاریدا بۆ هەڵبژاردنی داهاتووی پەرلەمانی کوردستان هەزار و ٢٦٦ ناوەندی دەنگدان بکاتەوە، کە دابەشدەبن بەسەر ٦ هەزار و ٥٤٢ بنکەی دەنگداندا، کە سەرجەمیان لەژێر چاودێری کامێرادان" .

 بەگوێرەی زانیارییەكانی PUKMEDIA كە فەرمانگەی كاروباری پارت و رێكخراوە سیاسییەكان لەکۆمسیۆن وەریگرتووە: "تێکڕا ٢٠ حزب و ٢ هاوپەیمانێتی و ٦٢ کاندیدی سەربەخۆ بۆ بەشداریکردن لە پرۆسەکە تۆمارکراون، کە لەبازنەکانی هەڵبژاردنی پەرلەمانی کوردستان بەشداردەبن".

بەگوێرەی مەرسومی سەرۆكایەتی هەرێمی كوردستان، رۆژی 10ی 6ی ئەمساڵ2024، هەڵبژاردنی پەرلەمانی كوردستان ئەنجامدەدرێت و پرۆسەكەش لەلایەن كۆمیسیۆنی باڵای سەربەخۆی هەڵبژاردنەكانی عیراقەوە بەڕێوەدەبرێت.

PUKMEDIA