سەرۆك کۆمار و سەرۆک وەزیران: باشترین خزمەتگوزاری پێشکەش بەهاووڵاتیان بکرێت

راگەیاندنی سەرۆککۆمار

سەرۆککۆمار و سەرۆک وەزیرانی عیراق

سەرۆك کۆمار د.لەتیف جەمال رەشید و محەمەد شیاع سودانی سەرۆكی ئەنجومەنی وەزیرانی عیراق کۆبونەوەو چەند پرسێکی گرنیان تاوتوێ کرد.

لە میانی دیدارەکەدا، کە ئەمڕۆ سێشەممە 19-3-2024 لە بەغدا بەڕێوەچوو، باس لە بارودۆخی سیاسی، ئەمنی، ئابوری، ژیان و خزمەتگوزاری لە وڵاتدا کرا و پەیوەندییەکانی عیراق لەگەڵ وڵاتانی ناوچەیی و نێودەوڵەتی و پەیوەندییەکانی نێوان حکومەتی فیدراڵی و حکومەتی هەرێمی کوردستان تاووتوێکران.

لەو دیدارەدا گرنگی یەکخستنی هەوڵەکان بۆ پاڵپشتیکردنی حکومەت لە جێبەجێکردنی بەرنامەی کار و پێشکەشکردنی باشترین خزمەتگوزاری بۆ هاووڵاتیان خرانەبەر باس و گفتوگۆ، هاوکات گەڕاندنەوەی ئاوارەکان بۆ زێدی خۆیان و تەواوکردنی پرۆسەی داخستنی کامپەکان بەشێوەیەکی هەمیشەیی لەو ماوەیەی حکومەت دیاریکردوە و بەردەوامیدان بە کاری هاوبەش بەمەبەستی تەواوکردنی شایستە دەستورییەکان، جەختیان لەسەر کرایەوە.

هەر لە دیدارەکەدا ئاماژە بە بەیاننامەی هاوبەشی کۆتایی نێوان کۆماری عێراق و کۆماری تورکیا و کاریگەرییە ئەرێنییەکانی کرا بۆ پتەوکردنی پەیوەندییە دووقۆڵییەکان و چەسپاندنی ئاسایش و سەقامگیریی لەناوچەکەدا.

PUKMEDIA