یادی کارەساتی کیمیابارانکردنی هەڵەبجە دەکرێتەوە

PUKMEDIA

مەراسیمی ساڵیادی کارەساتی کیمیابارانکردنی هەڵەبجە

ئەمڕۆ 16ی 3ی 2024، کە 36 ساڵ تێدەپەڕێت بەسەر کیمیابارانکردنی شاری هەڵەبجەدا، مەراسیمێکی شایستە بۆ ئەو بۆنە خەمناکە لە مۆنۆمێنتی شەهیدانی هەڵەبجە سازکرا، کە سەرەتای مەراسیمەکە بە ساتێک وەستان بۆ گیانی پاکی شەهیدانی هەڵەبجە و سەرجەم شەهیدانی کوردستان دەستیپێکرد.

هەڵەبجەییەکان لە خەمی کوردستاندان

پاشان چەند ئایەتێک لە قورئانی پیرۆز پێشکەش بە رۆحی شەهیدانی هەڵەبجە کرا، دواتر کامەران موستەفا بەڕێوەبەری کاروباری شەهیدان لە پارێزگای هەڵەبجە پاش وتەی بەخێرهاتنی میوانان، رایگەیاند: "یادی 36 هەمین ساڵیاد بەرز رادەگرین، هەڵەبجەییەکان و کەسوکاری سەربەزی شەهیدان لە هەمووکەس زیاتر لەخەمی ئایندەی هەرێمی کوردستانن، بۆیە ئێستا پەیامی یەکدەستەیی و یەک گوتاری سیاسی ئاڕاستەی لایەنە سیاسییەکانی هەرێمی کوردستان دەکەن".

"ئەمڕۆ لە هەمووکات زیاتر دەسەڵاتی سیاسی هەرێمی کوردستان پێویستی بەوەیە، بیری هەموولایەکی بخاتەوە کە مێژووی ئەم گەلە پڕە لە قوربانیدان، هەروەها جارێکی دیکە بەناوی کەسوکاری سەربەرزی شەهیدان و ئیدارەی پارێزگاری هەڵەبجە داوادەکەین ئاوڕی زیاتر لە هەڵەبجە بدرێتەوە"، بەڕێوەبەری کاروباری شەهیدانی پارێزگاری هەڵەبجە وای وت.

پارێزگاری هەڵەبجە: پێویستە عیراق ئاوڕ لە هەڵەبجە بداتەوە

دواتر ئازاد تۆفیق پارێزگاری هەڵەبجە رایگەیاند: "سوپاسی هەموولایەک دەکەین، لە رۆژی 16ی 3ی 1988 تەنها خۆمان بۆ خۆمان دەگریاین، ئێستاش بە پلەی یەکەم هەر خۆمانین کە خەم بۆخۆمان دەخۆین، پەیامی ئێمە لە ئیدارەی پارێزگای هەڵەبجە لە ساڵی 2018 سێ پەیام بووە، پەیامێک بۆ کۆمەڵگەی نێودەوڵەتی کە سەردانی سەرجەم سەفارەتەکانمان کردووە، پەیامی دووهەممان بۆ حکومەتی هەرێمی کوردستان بوو کە وتمان ئێمەی هەڵەبجەیی خاوەندی چەندان شۆڕشین و رەمزین بۆ مەزڵومیەتی کورد".

"تا ئەمڕۆ پەیامی سێهەممان بۆ حکومەتی عیراق بەردەوامە و دەبێت ئەوە بزانێت کە حکومەتی هەرێمی کوردستان لەڕووی دەستورییەوە خۆشی و ناخۆشییەکانی بەشێکە لە عیراقی ئەمڕۆ، وەک چۆن ئاوڕ لە نەجەفی پیرۆز دەکرێتەوە، بەوجۆرەش دەبێت ئاوڕ لە هەڵەبجە و شارەزوور و هەورامان بدرێتەوە"، پارێزگاری هەڵەبجە وادەڵێت.

هەڵەبجە قوربانی گەورەی داوە

دواتر هۆشمەند موراد لێپرسراوی کۆمەڵەی قوربانیانی کیمیابارانی هەڵەبجە رایگەیاند: "هەڵەبجە ئازارێکی نەبڕاوەیە و هاوارێکی بەردەوامە، هەڵەبجە هێما و شکۆ و ئایندەیە و نیشانەی خۆڕاگرییە، لە ئاست داگیرکەراندە هەمیشە سەری بڵند و باڵا بووە، هەڵەبجە هەمیشە بەپێوە وەستاوە".

"هەڵەبجە بە درێژایی مێژوو، مەڵبەندی شۆڕش و قوربانیدان بووە، لەپێناو کورد و کوردستان و رۆڵەکانیدا قوربانی گەورەی داوە، ئەوەی هەڵەبجە لە دۆسیەی کورددا هێنایە بوون، بە سەدان ساڵی خەبات نەدەهاتە بوون، بەڵام بەداخەوە لە بری پاداشت و قەرەبووکردنەوەی، لەلایەن حکومەتی هەرێمەوە پەراوێزخراوە".

لە کۆتایی مەراسیمەکەشدا چەند چالاکییەکی میوزیکی پێشکەشکرا.
PUKMEDIA