ئاسۆ مامەند: بۆ رێگری لەدووبارەبوونەوەی كارەساتی هەڵەبجە پێویستمان بەیەكڕیزییە

PUKMEDIA

هەڵەبجە

ئاسۆ مامەند سەرپەرشتیاری كەركوك-سەڵاحەدینی یەكێتیی نیشتمانیی كوردستان لە ساڵیادی كارەساتی كیمیابارانی هەڵەبجەدا پەیامێكی بڵاوكردەوەو رایگەیاند: "یادكردنەوەی ئەم كارەساتە جەختكردنەوەیە لەگرتنەبەری رێوشوێنەكان بۆ رێگریكردن لە دووبارەبوونەوەی تاوانی لەو شێوەیە و جینۆسایدی گەلەكەمان".

دەقی پەیامی هەڤاڵ ئاسۆ مامەند بۆ ساڵڕۆژی كیمیابارانی هەڵەبجە:

رۆژی ١٦ی ئاداری ئەمساڵ سی و شەش ساڵ بە سەر كارەسات و تاوانی كیمیابارانكردنی هەڵەبجەی شەهیددا تێدەپەڕێت كە لە لایەن ڕژێمە سەركوتكارەكەی پێشووی عێراقەوە ئەنجامدرا و بەهۆیەوە پێنج هەزار هاووڵاتیی بێتاوان شەهیدبوون، و بە هەزارانی دیكەش برینداربوون، كە تاوەكو ئێشتایش كاریگەری و لێكەوتەكانی ئەو تاوانە ‌بە سەر باری دەروونی و تەندروستی هاووڵاتییانی هەڵەبجە و ژینگەی ناوچەكەوە بەردەوامە.

یادكردنەوەی ئەم كارەساتە وێڕای رێزگرتن لە قوربانییانی گەلەكەمان، بە تایبەت شەهیدانی ئەو كارەساتە، هاوكات جەختكردنەوەشە لەسەر گرتنەبەری ڕێوشوێنەكان بۆ ڕێگریكردن لە دووبارەبوونەوەی تاوانی لەو شێوەیە و جینۆسایدی گەلەكەمان. بۆ گرتنەبەری ئەم ئامانجەیش، یەكڕیزی و تەباییی زیاترمان لێدەخوازێت.

لەم یادەدا جارێكی دیكە جەخت دەكەینەوە كە گرینگی زیاتر بە ژیان و گوزەران و خزمەتكردنی كەسوكاری قوربانیان و بریندارانی ئەو تاوانە بدرێت، كە بە داخەوە تاوەكو ئێستا هەردوو لایەنی پەیوەندیدار حكومەتی فیدراڵ و هەرێمی كوردستان، هیچ جۆرە هەنگاوێكی دڵخۆشكەریان نەناوە بە ئاراستەی قەرەبووكردنەوەی ماددی و مەعنەویی قوربانیانی ئەو تاوانە.

لە بیرەوەری (٣٦)مین ساڵڕۆژی كیمیابارنكردنی هەڵەبجەدا؛
-سڵاوو وەفا بۆ رۆحی پاكی قوربانیانی ئەو تاوانە دەنێرین.
-روو ڕەشی بۆ ئەنجامدەر و هاوكارانی ئەو تاوانە قێزەوەنە.

ئاسۆ مامەند 
سەرپەرشتیاری كەركوك-سەڵاحەدینی یەكێتیی نیشتمانیی كوردستان

PUKMEDIA