کۆمسیۆن دەرگای خۆتۆمارکردن بۆ حزب و لایەن و کاندیدە سەربەخۆکان دەکاتەوە

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

کۆمسیۆنی باڵای سەربەخۆی هەڵبژاردنەکانی عیراق دەرگای خۆتۆمارکردنی بۆ لیست و هاوپەیمانێتی و کاندیدەکان دەکاتەوە و ماوەی 10 رۆژ دیاری دەکات بۆ ناو تۆمارکردن.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق بە وێبسایتی رەسمیی یەێتیی نیشتمانیی کوردستان PUKMEDIA ی راگەیاند: "بڕیاردرا لە 13ی 3ی 2024 هەتا 22ی 3ی 2024 دەرگای ناوتۆمارکرن بۆ حزب و لایەنەکان بکاتەوە بۆئەوەی لەو وادەیەدا ناوی لیست و هاوپەیمانێتی و کاندیدەکانیان تۆماربکەن".

"پێویستە هەر حزب و لایەنێک کە دەیەوێت بەشداری هەڵبژاردنی داهاتووی پەرلەمانی کوردستان بکات، لەو وادەیەدا ناوی لیستەکەی یان ئەگەر هاوپەیمانێتی ئەنجامداوە، ناوی هاوپەیمانێتییەکە لە کۆمسیۆن تۆماربکات، هاوکات کاندیدە سەربەخۆکانیش لەو وادەیەدا دەتوانن ناوی خۆیان تۆمار بکەن"، وتەبێژی کۆمسیۆن وادەڵیت.

ئەمەش لەکاتێکدایە، بەپێی بڕیارێکی کۆمسیۆنی باڵای سەربەخۆی هەڵبژاردنەکانی عیراق، لە رۆژی 5-3ـەوە هه‌تا 14-3-2024، ده‌رگای خۆتۆماركردنی هاوپه‌یمانێتییه‌كان کراوەتەوەو حزبه‌كان ده‌توانن له‌و واده‌یه‌دا ناوی هاوپه‌یمانێتییه‌کانیان بۆ كۆمسیۆن بنێرن.
PUKMEDIA