وتەبێژی كۆمسیۆن: كاتی تۆماری بایۆمەتری درێژناكرێتەوە

PUKMEDIA

كارتی دەنگدان

ئەمڕۆ 10-3-2024، كۆتایی بە پڕۆسەی تۆماری بایۆمەتری دەنگدان دەهێندرێت و وتەبێژی كۆمسیۆنی عیراقیش دەڵێت: "وادەكە درێژناكرێتەوە، بەڵام بۆ پێكهێنانی هاوپەیمانێتی چەند رۆژێك كات ماوە".

ناوت لەتۆماری دەنگداندا نەبێت بەشداری دەنگدان ناكەیت

جومانە غەلای وتەبێژی كۆمسیۆنی باڵای سەربەخۆی هەڵبژادنەكانی عیراق بە وێبسایتی رەسمی یەكێتیی نیشتمانیی كوردستان PUKMEDIA ی راگەیاند: "لەگەڵ تەواوبوونی دەوامی رەسمی ئەمڕۆدا كۆتایی بە وادەی نوێكردنەوەو تۆماركردنی تۆماری دەنگدەران دەهێندرێت و وادەكەی درێژناكرێتەوە".


"ئەو دەنگدەرانەی بەدەم بانگەوازی كۆمسیۆنەوە نەهاتوون و ناوی خۆیان تۆمار نەكردووەو تۆماری دەنگدانیان نوێ نەكردووەتەوە، ناتوانن بەشداری دەنگدان بۆ هەڵبژاردنی داهاتووی پەرلەمانی كوردستان بكەن" جومانە غەلای  وادەڵێت.

دابەشكردنی كارتی بایۆمەتریی دەنگدان بەردەوامە

لەگەڵ ئەوەی لە 1ی كانوونی دووەمی 2024 ەوە، پڕۆسەی دابەشكردنی كارتی بایۆمەتریی دەنگدان لە هەرێمی كوردستان دەستیپێكردووەو بەردەوامی هەیە، بەڵام ئەمڕۆ 10ی ئاداری 2024 كۆتا وادەبوو بۆ ناوتۆماركردن.

 
وتەبێژی كۆمسیۆنی باڵای سەربەخۆی هەڵبژاردنەكانی عیراق راشیگەیاند: "تاوەكو رۆژی 5ی ئادار، 10 هەزار و 810 كارتی بایۆمەتری دەنگدانیان دابەشكردووە كە لە هەولێر 806 كارت، لە دهۆك دوو هەزار و 838 و لە سلێمانی 7 هەزار و 166 كارت بووە".


 "كۆمسیۆن لەرۆژی 5-3 هەتا 14-3 دەرگای خۆتۆماركردنی هاوپەیمانێتییەكان دەكاتەوەو حزبەكان دەتوانن لەو وادەیەدا ناوی حزبەكان و ناوی هاوپەیمانێتییەكە و ناوی كاندیدەكانیان بۆ كۆمسیۆن بنێرن، هەر حزبێكیش بیەوێت لە هەڵبژاردن بكشێتەوە پێویستە پێش ئەوەی هاوپەیمانێتی لەگەڵ حزبێكی دیكەدا بكات، بەنووسراوی رەسمی لەڕ‌‌ێگەی سەرۆكی حزبەكەوە ئاڕ‌‌استەی كۆمسیۆن بكرێت داوای كشانەوە لەكۆمسیۆن بكات" جومانە غەلای وادەڵێت.

ئەمەش لەكاتێكدایە، رۆژی 4ـی ئاداری 2024 بۆ دووەم جار كۆمسیۆنی باڵای سەربەخۆی هەڵبژاردنەكانی عیراق تۆماری بایۆمەتری درێژكردەوە.

PUKMEDIA