کۆمسیۆن لیژنەیەکی باڵا بۆ بەڕێوەبردنی هەڵبژاردن پێکدەهێنێت

PUKMEDIA

پەرلەمانی کوردستان

کۆمسیۆنی باڵای سەربەخۆی هەڵبژاردنەکانی عیراق لیژنەیەکی بۆ راپەڕاندنی کارەکانی هەڵبژاردنی پەرلەمانی کوردستان پێکدەهێنێت، کە بڕیارە رۆژی 10-6-2024 ئەنجامبدرێت، وتەبێژی کۆمسیۆنیش دەڵێت: "ئامانج لە دروستکردنی ئەو لیژنانە باشتر راپەڕاندنی کارەکانی هەڵبژاردنەکەیە، لە رووی تەکنیکی و دارایی و ئیداری و یاساییەوە".

لیژنە بۆ راپەڕاندنی کارەکانی هەڵبژاردنی پەرلەمان پێکهێنرا

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عیراق لە لێدوانێکیدا بۆ وێبسایتی رەسمی یەکێتیی نیشتمانیی کوردستان PUKMEDIA رایگەیاند: "بە فەرمانێکی وزاری کۆمسیۆنی باڵای سەربەخۆی هەڵبژاردنەکانی عیراق لیژنەیەکی ناوەندی بۆ راپەڕاندنی کارەکانی هەڵبژاردنی پەرلەمانی کوردستان پێکهێناوە، کە وا بڕیارە لە 10-6-2024 بەڕێوەبچێت، کە دادوەر عەباس فەرحان حەسەن سەرۆکایەتی لیژنەکە دەکات و ئەندامانی لیژنەش لەچەند بەڕێوەبەرێکی گشتی پێکهاتوون".

"ئەرک و بەرپرسیارێتییەکانی ئەم لیژنەیە جێبەجێکردنی بڕیارەکانی ئەنجومەنی کۆمسیاران و دانانی نەخشەی کارە بۆ بەڕێوەبردنی پرۆسەی هەڵبژاردنی پەرلەمانی کوردستان و چاودێریکردنی یەکە ئیدارییەکانی سەربە کۆمسیۆن لە هەرێمی کوردستان و چاودێری کارە تەکنیکی و دارایی و ئیداری و یاساییەکان دەکەن بۆ ئەنجامدانی هەڵبژاردن"، جومانە غەلای وای وت.

PUKMEDIA