وتەبێژی یەکێتی: دەستکەوتەکانی راپەڕین بەیەکڕیزی دەپارێزرێت

PUKMEDIA

سەعدی ئەحمەد پیرە وتەبێژی یەکێتیی نیشتمانیی کوردستان

وتەبێژی یەکێتیی نیشتمانیی کوردستان رایدەگەیەنێت:" پاراستنی دەستکەوتەکانی راپەرین و شارو شارۆچکەکانمان و جێبەجێکردنی ماددەی ١٤٠ ی دەستوور، تەنها بە یەکڕیزی دەبێت و ناڕێکی پەیوەندییەکانمان هیچ سوودێکمان پێ ناگەیەنێت".

گەیشتن بە راپەڕین ئاسان نەبوو

سەعدی ئەحمەد پیرە وتەبێژی یەکێتیی نیشتمانیی کوردستان لە ٣٣ هەمین ساڵیادی راپەڕینی خەڵکی کوردستان لە کۆنگرەیەکی رۆژنامەوانیدا رایگەیاند:" گەیشتن بە رۆژێکی وەک راپەڕین و هەڵبژاردنی پەرلەمان و دامەزراندنی حکومەتی هەرێم ئاسان نەبوو، بەجۆرێک تەنها لە رۆژی ئەنفالەکان سەرو ١٨٠ هەزار هاوولاتی بە زیندویی ئەنفالکران و لە هەڵەبجە و ناوچەکانی تر چەندین گوند خاپوورکران و هەزاران کەسمان بوونە قوربانی ئەم رۆژەی ئێستا تێیداین".

راشیگەیاند:" دەرەنجامی راپەڕین و ئازادی خەڵکی هەرێمی کوردستانە، کە لەماوەی ٣٣ ساڵی رابردوودا ٥ هەڵبژاردنی پەرلەمانمان ئەنجامداوە و هەنگاو بەرەو شەشەمین هەڵبژاردن دەنێین، کە پرۆسەیەکی دیموکراسییە و یەکێتیی نیشتمانیی کوردستان خوێنی بۆ رشتووە".

ناڕێکی پەیوەندییەکانمان سودمان پێناگەیەنێت

سەبارەت بەچۆنێتی پاراستنی دەستکەوتەکانی راپەڕین وتەبێژی یەکێتی وتی:"پاراستنی دەستکەوتەکانی راپەرین و شارو شارۆچکەکانمان و جێبەجێکردنی ماددەی ١٤٠ ی دەستوور تەنها بە یەکڕیزی دەبێت و ناڕێکی پەیوەندییەکانمان هیچ سوودێکمان پێ ناگەیەنێت".

بێڕێزیی بەرامبەر پێشمەرگە، بێڕێزییە بەرامبەر جیهان

 سەبارەت بەڕۆڵی بەردەوامی پێشمەرگە سەعدی ئەحمەد پیرە ئاماژەی بەوەکرد:"هەر بێڕێزییەک بەرامبەر پێشمەرگە بێڕێزییە بەرامبەر هەموو جیهان، چونکە پێشمەرگە بوو لەبری هەموو جیهان شەڕی تیرۆری دەکرد، هاوکات رۆڵی فەرماندەکانی پێشمەرگە هەموو کات لە پارێزگاریکردنی عیراق دیاربووە و کۆتا سەروەریش شەڕی روبەڕووبونەوەیان بوو دژی داعش".

بۆ بینینی ڤیدیۆ کلیک لەم لینکە بکە....

PUKMEDIA