یەکەم ئاهەنگی دەرچون بۆ 1838 خوێندکاری خوێندنی باڵای زانکۆی سلێمانی رێکخرا

PUKMEDIA

ئاهەنگی دەرچونی خوێندکارانی خوێندنی باڵای زانکۆی سلێمانی

زانکۆی سلێمانی بۆ یەکەم جار لەسەر ئاستی زانکۆکانی هەرێمی کوردستان ئاهەنگی دەرچوانی بۆ هەزار و 838 خوێندکارانی خوێندنی باڵا سازکرد، کە 750 دەرچوو تێیدا بەشدار بوون.

د. یۆهان عوسمان بەڕێوەبەری بەرێوەبەرایەتی راگەیاندن و رۆشنبیری زانکۆی سلێمانی بە سایتی رەسمی یەکێتیی نیشتمانیی کوردستان PUKMEDIA ی راگەیاند: "ئەمڕۆ 4-3-2024 یەکەمین ئاهەنگی دەرچوان بۆ خوێندکارانی خوێندنی باڵا کە دەرچوانی دبلۆمی باڵا و ماستەر و دکتۆرا بوو، بۆ ساڵەکانی 2018 هەتا 2024 لە زانکۆی سلێمانی ئەنجامدرا".

"لە ئاهەنگەکەدا زیاتر لە 750 دەرچووی خوێندنی باڵا بەشداربوون، کە بۆ یەکەم جاربوو لەسەر ئاستی زانکۆکانی هەرێمی کوردستان ئاهەنگی دەرچون بۆ خوێندکارانی خوێندنی باڵا ئەنجام بدرێت"، د. یۆهان وای وت.

خوێندکاری ساڵانی 2018 هەتا 2024 بوون

بەڕێوەبەری بەرێوەبەرایەتی راگەیاندن و رۆشنبیری زانکۆی سلێمانی راشیگەیاند: "لە ساڵی 2018 هەتا 2024 هەزار و 838 خوێندکاری خوێندنی باڵا بڕوانامەی دبلۆمی باڵا و ماستەر و دکتۆرایان لە زانکۆی سلێمانی بەدەستهێناوەو لەو ژمارەیەش زیاتر لە 750 خوێندکار بەشداری یەکەمین مەراسیمی ئاهەنگی دەرچوانی خوێندنی باڵایان کرد.

مەراسیمەکە بە ئامادەبونی د. ئارام محەمەد وەزیری خوێندنی باڵا و توێژینەوەی زانستی و د. هەڤاڵ ئەبوبەکر پارێزگاری سلێمانی و د. کۆسار محەمەد سەرۆکی زانکۆی سلێمانی و یاریدەدەرانی و راگرانی کۆلێژەکان لە هۆڵی کۆنگرێسی زانکۆی سلێمانی بەڕێوەچوو.

PUKMEDIA