لایەنە براوەكانی كەركوك كۆدەبنەوە

نووسینگەی راگەیاندنی سەرۆكوەزیرانی عیراق

كۆبوونەوەی لایەنە براوەكانی كەركوك

بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان و محەمەد شیاع سودانی سەرۆكوەزیرانی عیراق، لایەنە سیاسییە براوەكانی هەڵبژاردنی ئەنجومەنی پارێزگای كەركوك لە بەغدا بۆ تاوتوێكردنی هەنگاوەكانی پێكهێنانی حكومەتی خۆجێیی كەركوك كۆبوونەوە.

بەگوێرەی راگەیەندراوێكی نووسینگەی رۆژنامەوانی سەرۆكوەزیرانی عیراق لە كۆبوونەوەكەدا لایەنەكانی كەركوك رێككەوتن لە سەر بەردەوامی گفتوگۆكان تا گەیشتن بە چارەسەری كێشەكان و یەك كارنامەی هاوبەش تاوەكو لە دوو هەفتەی داهاتوودا پارێزگار  و سەرۆكی ئەنجومەنی كەركوك هەڵبژێردرێن. 

هەر بەگوێرەی راگەیەندراوەكە، لەكۆبوونەوەكەدا كارنامەی لایەنە براوەكان خراوەتەڕوو بۆ ئەوەی یەك كارنامەی هاوبەش دروستبكرێت و بڕیار لەسەر خاڵە هاوبەشەكان بدرێت.

ئەمەش لەكاتێكدایە رۆژی 21-2-2024، بە ئامادەبوونی بافڵ جەلال تاڵەبانی سەرۆكی یەكێتیی نیشتمانیی كوردستان و محەمەد شیاع سودانی سەرۆك وەزیرانی عیراق، لایەنە سیاسییە براوەكانی كەركوك لە بەغدا بۆ تاوتوێكردنی هەنگاوەكانی پێكهێنانی حكومەتی خۆجێیی كەركوك و دیاریكردنی پارێزگارو سەرۆكی ئەنجوومەنی پارێزگای كەركوك یەكەمین كۆبوونەوەیان ئەنجامداو ئەمڕۆش جارێكی دیكە لایەنە براوەكانی كەركوك لەگەڵ سەرۆكوەزیرانی عیراق و سەرۆكی یەكێتی كۆبوونەوەو كارنامەی لایەنە براوەكان خرايەڕوو.


PUKMEDIA