‎سەرۆككۆمار: دەسەڵاتەكانی هەرێم دەستورین

نووسینگەی سەرۆككۆماری عیراق

چاوپێكەوتنی د.لەتیف جەمال رەشید سەرۆككۆماری عیراق لەگەڵ كەناڵی ئەلحەدەس

سەرۆككۆماری عیراق رایدەگەیەنێت: "دەسەڵاتەكانی هەرێمی كوردستان دەستورین و هیچ لایەنێكی عیراقی نییە، داوای لێسەندنەوەیان بكات، چونكە عیراق دەوڵەتێكی فیدراڵییە و مافی هەرێم مسۆگەردەكات"، وتیشی: "هێزە ئەمنییەكانی عیراق لە ئاستێكی باشدان و توانای روبەڕوبوونەوەی ئاڵنگارییە ناوخۆیی و دەرەكییەكانیان هەیە، هاوكات ناكۆكییەكان لە ناوچەكەدا چارەسەر دەكرێن و مەحاڵ نین".

د.لەتیف جەمال رەشید سەرۆككۆماری عیراق، لە نوێترین چاوپێكەوتنیدا لەگەڵ كەناڵی ئەلحەدەس رایگەیاند: "پەیوەندییەكانمان لەگەڵ توركیا لەڕووی سیاسی و بازرگانی و وەبەرهێنانەوە باشن، چەند تێبینییەكی ئەمنیمان هەیە، كە دەبێت لە چوارچێوەی دانوستانەكاندا كار بۆ چارەسەركردنیان بكرێت".

وتیشی: "عیراق بەدەست قەیرانی ئاوەوە دەناڵێنێت، هەموو سەرچاوە ئاوییەكانمان لە دەرەوەی وڵاتەوە دێن و داوای لێكتێگەیشتن لەگەڵ ئێران و توركیا دەكەین بۆ دەستەبەركردنی پشكی دادپەروەرانە بۆ هەموو لایەك".

لەبارەی هەرێمی كوردستانەوە سەرۆككۆمار راشیگەیاند: "دەسەڵاتەكانی هەرێمی كوردستان دەستورین و هیچ لایەنێكی رەسمی عیراقی نییە، كە داوای لێسەندنەوەی ئەو دەسەڵاتانە بكات، عیراق دەوڵەتێكی فیدراڵییە و مافی هەرێمی كوردستان مسۆگەردەكات، هەرچەندە هەندێك كێشە لەنێوان حكومەتی فیدراڵی و هەرێمی كوردستان لەسەر پرسەكانی بودجە و نەوت و مووچە هەن،  گفتوگۆكردن لەبارەیانەوە لەڕێگەی لیژنە هاوبەشەكانەوە بەردەوامە و دڵنیاین، كە ئەنجامی ئەرێنییان دەبێت".

ئاماژەی بەوەشدا: "هاوپەیمانیی نێودەوڵەتی بۆ یارمەتیدانبوو لە جەنگی دژی تیرۆر و رێكخروای داعشدا و ئێستا هەڕەشەی داعش بوونی نییە، لەمڕۆدا هێزە ئەمنییەكانی عیراق لە ئاستێكی باشدان و توانای روبەڕوبوونەوەی ئاڵنگارییە ناوخۆیی و دەرەكییەكانیان هەیە". 

د.لەتیف جەمال رەشید ئەوەشی راگەیاند: "بەكارهێنانی خاكی عیراق بۆ ئەنجامدانی هێرش یان هەڕەشەكردن لە هەر وڵاتێكی دراوسێ رەتدەكەینەوە، راسپاردەمان بۆ ئەو كوردانەی لە ئێران و توركیاوە هاتون بۆ عیراق و نیشتەجێبون ئەوەیە، كە دەبێت رێز لەم پرەنسیپە بگرن".

وتیشی: "هاوپەیمانیی نێودەوڵەتی بە رێككەوتن لەگەڵ حكومەتی عیراق بوونی هەیە و هەر خشتەیەك بۆ مانەوە یان دەرچوونیان لە عیراق بە بڕیاری حكومەت و بە هەماهەنگی لەگەڵ هێزە سیاسییەكان و ئەنجومەنی نوێنەران دەبێت و بڕیاری كۆتاییش لە دەستی حكومەتی عیراقدایە". 

سەرۆككۆماری عیراق، لە درێژەی چاوپێكەوتنەكەیدا ئەوەشی خستەڕوو: "سەركەوتوبوین لە نزیككردنەوەی بۆچونەكانی سعودیە و ئێران لە یەكتر و كاردەكەین بۆ گەڕاندنەوەی سوریا بۆ كۆمكاری عەرەبی و هەوڵی دیكەشمان هەیە لەبارەی چەندین دۆسێ لە ناوچەكەدا، ناكۆكییەكان لە ناوچەكەدا چارەسەر دەكرێن و مەحاڵ نین، جەختیش لە بەدیهێنانی بەرژەوەندییە هاوبەشەكان دەكەینەوە بە سودوەرگرتن لە سەرچاوە زۆرەكانی ناوچەكە لەبری ئەوەی سەرقاڵی جەنگ و ململانێكان بین". 

PUKMEDIA