جومانە غەلای: دیاریکردنی وادەی هەڵبژاردنی هەرێم پیشنیازە و جێگیر نییە

PUKMEDIA

هەڵبژاردنی پەرلەمانی کوردستان

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئه‌وه‌ ئاشكراده‌كات، " كۆبونه‌وه‌ی ئه‌مڕ‌ۆی كۆمسیۆنی باڵای سه‌ربه‌خۆی هه‌ڵبژاردنه‌كان و سه‌رۆكایه‌تی هه‌رێمی كوردستان و نوێنه‌رایه‌تی نه‌ته‌وه‌ یه‌كگرتووه‌كان بۆ دیاریكردنی واده‌یه‌كی پێشنیازكراوه‌، ئه‌مه‌ش له‌كاتێكدایه‌ بۆ هه‌ڵبژاردنی په‌رله‌مانی كوردستان كۆمسیۆن چاوه‌ڕ‌وانی بڕ‌یاری دادگای فیدراڵییه‌".

کۆمسیۆن چاوەڕوانی بڕیاری دادگای فیدراڵییە

جومانه‌ غه‌لای له‌ لێدوانێكی تایبه‌تدا به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "كۆبونه‌وه‌ی ئه‌مڕ‌ۆمان له‌گه‌ڵ سه‌رۆكایه‌تی هه‌رێمی كوردستان بۆ دیاریكردنی واده‌یه‌كی پێشنیازكراوه‌ بۆ هه‌ڵبژاردنی په‌رله‌مانی كوردستان، له‌گه‌ڵ ئه‌وه‌شدا چاوه‌ڕ‌وانی بڕ‌یاری دادگای فیدراڵی ده‌كه‌ین بۆ یه‌كلایی كردنه‌وه‌ی سكاڵاكان له‌سه‌ر یاسای هه‌ڵبژاردن له‌هه‌رێمی كوردستان".

"دادگای باڵای فیدراڵی ده‌بێت كێشه‌كانی بازنه‌كانی هه‌ڵبژاردن یه‌كلایی بكاته‌وه‌و بڕ‌یاری له‌سه‌ر بدات و ئه‌مه‌ش گۆڕ‌انكاری له‌ به‌رنامه‌ی كاردا ده‌كات و دواتریش كۆمسیۆن پێویستی به‌چوار مانگ هه‌یه‌ بۆ به‌ڕ‌ێوه‌چوونی پرۆسه‌ی هه‌ڵبژاردن"، جومانه‌ غه‌لای وای وت.

نزیکەی 32 هەزار کەس ناویان تۆمارکردووە 

وته‌بێژه‌كه‌ی كۆمسیۆن ئاماژه‌ی بۆ ئه‌وه‌شكرد: "له‌گه‌ڵ كردنه‌وه‌ی ناوه‌نده‌كانی تۆماری ده‌نگده‌ران له‌ هه‌رێمی كوردستان هه‌تا ئێستا 18 هه‌زار كه‌س ناویان تۆمار كردووه‌ كه‌ موالیدیان 2006 و به‌كۆی گشتیش هه‌تا به‌رواری 15-2-2024 زیاتر له‌ 31 هه‌زار و 889 كه‌س ناویان تۆماركردووه‌، تا ئه‌م واده‌یه‌ش زیاتر له‌ 2 ملیۆن و 350 هه‌زار كه‌س كارتی نوێی ده‌نگدانیان وه‌رگرتووه‌ ".

 
ئه‌مه‌ش له‌كاتێكدایه‌، دادگای فیدراڵی 11 جار دانیشتنی دادگاكه‌ی له‌سه‌ر سكاڵایه‌كی یه‌كێتیی نیشتمانیی كوردستان بۆ یاسای هه‌ڵبژاردن دواخستووه‌ تا ئێستا ئه‌و پرسه‌ یه‌كلایی نه‌بوه‌ته‌وه‌و یه‌كێتی-ش ته‌ئكید له‌وه‌ ده‌كاته‌وه‌ كه‌ سكاڵاكه‌یان ناكشێننه‌وه‌و پێویسته‌ دادگای فیدراڵی ئه‌و پرسه‌ یه‌كلایی بكاته‌وه‌، كه‌ سكاڵاكه‌ له‌سه‌ر مادده‌كانی (1-9-15-22-36)ی یاسای هه‌ڵبژاردنه‌كانی په‌رله‌مانی كوردستانه‌.

PUKMEDIA