یەكێتی سكاڵاكەی ناكشێنێتەوەو دادگاش كۆدەبێتەوە

PUKMEDIA

دادگای باڵای فیدراڵی عیراق

بڕیارە ئەمڕۆ 18-2-2024 جارێكی تر دادگای فیدراڵی لەسەر سكاڵاكەی یەكێتیی نیشتمانیی كوردستان لەبارەی هەمواری یاسای هەڵبژاردن كۆببێتەوە، لەكاتێكدا 10 جار ئەم دۆسیەیە لەلایەن دادگاكەوە دواخراوەو وتەبێژی یەكێتییش لە چاوپێكەوتنێكی PUKMEDIA دا دەڵێت: "هیچ بڕیارێك نەدراوە بۆ كشانەوەی سكاڵاكەی یەكێتی لە دادگای باڵای فیدراڵی و یەكێتی داوایەكی یاسایی كردووە".

 داواكە لەلایەن زیاد جەبار، سەرۆكی فراكسیۆنی یەكێتی لە خولی پێنجەمی پەرلەمانی كوردستان و ئامانج شەمعون، ئەندامی ئەنجومەنی پارێزگای سلێمانی تۆماركراون، تایبەتە بە نادەستورییبوونی ژمارەیەك ماددەی یاسای هەڵبژاردنی پەرلەمانی كوردستان.

وتەبێژی یەكێتی: رێز لە بڕیاری دادگا دەگرین

سەعدی ئەحمەد پیرە وتەبێژی یەكێتی لە چاوپێكەوتنێكیدا لەگەڵ سایتی رەسمی یەكێتیی نیشتمانیی كوردستان PUKMEDIA رایگەیاند: "هەتا ئێستا هیچ بڕیارێك نەدراوە بۆ كشانەوەی سكاڵاكەی یەكێتیی نیشتمانیی كوردستان لە دادگای باڵای فیدراڵی عیراق لەسەر یاسای هەڵبژاردن، دواخستنی بڕیاردان لەسەر ئەو سكاڵایەش تاوانی یەكێتی تێدا نییە".

"یەكێتی داوایەكی یاسایی كردووە بۆ ئەوەی كۆتاكان لە هەڵبژاردن و پەرلەمان نوێنەری راستەقینەی خۆیان هەبێت و نەبنە دارەدەستی هیچ لایەنێكی سیاسی، هەر لایەنێكیش دژی ئەو داوایەیە شینی خۆی دەكات و دەزانێت دەنگەكانی ئەوان كەم دەكات، پێویستیشە دادگای فیدراڵی ئەو داوایە بەلایەكدا بخات و ئێمەش رێز لە بڕیارەكە دەگرین"، وتەبێژی یەكێتی وای وت.

 چەندین جار دانیشتنەكە دواخراوە

سكاڵاكەی یەكێتیی نیشتمانیی كوردستان تایبەتە بە پێنج ماددە لە یاسای هەڵبژاردنی پەرلەمانی كوردستان، كە لەلایەن زیاد جەبار سەرۆكی فراكسیۆنی یەكێتیی نیشتمانیی كوردستان لە خولی پێنجەمی پەرلەمانی كوردستان لەسەر ماددەكانی (1-9-15-22-36)ی یاسای هەڵبژاردنەكانی پەرلەمانی كوردستان تۆماركراوە، كە پێشتریش 10 جاری دیكە دانیشتنەكەی دادگای فیدراڵی بۆ تاوتوێكردنی سكاڵایەكی یەكێتی تایبەت بە یاسای هەڵبژاردن لە هەرێمی كوردستان دواخراوە.

 هەروەها یەكێتی لەرێگەی ئەم سكاڵایەوە دەیەوێت بۆ هەڵبژاردنی داهاتووی پەرلەمانی كوردستان، كار بە یاسای ئەنجومەنی نیشتمانی كوردستانی عیراق بكرێت، كە ساڵی 1992 لەلایەن بەرەی كوردستانییەوە دەركراوە.

ڤیدیۆ.. وتەبێژی یەکێتی لەسەر دانیشتنی دادگای فیدراڵی قسە دەکات

PUKMEDIA