سەرۆککۆماری عیراق فەرمانی دەستبەکاربونی پارێزگاری سەڵاحەدین رەتدەکاتەوە

PUKMEDIA

سەرۆککۆماری عیراق

د. لەتیف رەشید سەرۆککۆمارى عێراق رەتیدەکاتەوە، فەرمانی دەستبەکاربوون بۆ پارێزگاری نوێی سەڵاحەدین دەربکات  و  "داوا لەئەنجوومەنی پارێزگاکە دەکات کەسێکی شایستە هەڵبژێرن" .

لە نووسراوێکدا  کە رۆژی 12ی 2ی 2024 بە ژمارە 1/41/67 ئاڕاستەی سەرۆکایەتی ئەنجوومەنی پارێزگای سەڵاحەدینی کردووە، رایدەگەیەنێت:" هەڵبژاردنی ئەحمەد عەبدوڵا جبوری وەکو پارێزگاری سەڵاحەدین پێشێلکردنی یاسای هەڵبژاردنی ئەنجوومەنی پارێزگاکان بووە".

لەنوسراوەکەدا کە وێنەیەکی دەست PUKMEDIA کەوتوە و وەڵامی سەرۆکایەتی کۆمارە بۆ نوسراوی ژمارە 460ی رۆژی 4ی2ی2024ی ئەنجومەنی پارێزگاکە و دەڵێت:" پارێزگارى هەڵبژێردراوی سەڵاحەدین لە چەندین دۆسیەی یاساییدا سزادراوە و بە لێبوردنی گشتی ئازادکراوە، هەروەها لە چەندین کەیسی دیکەدا بە کەفالەت ئازادکراوە" بۆیە داوایان لێدەکات:" جارێکی دیکە ئەنجومەنی پارێزگای سەڵاحەدین دەرگای خۆپاڵاوتن بۆ پۆستی پارێزگار بکاتەوە و کاندیدێک هەلبژێرن کە سەرجەم مەرجەکانی  تێدابێت".

لیتسی چوارچێوەی هەماهەنگی کە خاوەنی سێ کورسییە لە ئەنجومەنی پارێزگای سەڵاحەدین لە کۆی 15 کورسی، داوای پۆستی سەرۆکی ئەنجوومەن یاخود جێگری پارێزگاریان کردووە.

رۆژی 4ـى 2ـى 2024، ئەنجومەنی پارێزگای سەڵاحەدین، بەدەنگی نۆ ئەندام لە کۆی 15 ئەندام، ئەحمەد عەبدوڵا جبوری (ئەبو مازن)ى بە پارێزگای سەڵاحەدین هەڵبژارد.

لەچەند رۆژی رابردوودا سەرۆککۆماری عیراق مەرسومی دەستبەکاربوونی بۆ 12 پارێزگار دەرکرد، بەڵام هێشتا مەرسوم بۆ پارێزگارەکانی کەرکوک و دیالە و سەڵاحەدین دەرنەکراوە.

PUKMEDIA