سەرۆكکۆمار: بڕگەکانی یاسای کچان و ژنانی رزگاربووی ئێزدی کارابکرێن

نوسینگەی رۆژنامەوانی سەرۆککۆمار

وێنەی کۆبوونەوەکە

د.لەتیف رەشید، سەرۆککۆماری عێراق پێشوازی لە مەلا کەریم شکور جێگری سەرۆکی فراکسیۆنی یەکێتیی نیشتمانیی کوردستان لە ئەنجومەنی نوێنەران کرد.

لە میانی دیدارەکەدا، باس لە پێشهاتە گشتییەکانی وڵات کرا، لەوبارەیەوە سەرۆكکۆمار جەختیکردەوە لە گرنگی دەرکردنی یاسا پێویستەکان لە ئەنجومەنی نوێنەراندا بەتایبەتی ئەوانەی دەبنەهۆی باشترکردنی بارودۆخی ژیان و ئەو خزمەتگوزارییە بنەڕەتیانەی پێشکەش بە هاووڵاتیان دەکرێن.

هەروەها سەرۆكکۆمار ئاماژەیکرد بە بایەخی هاریکاری نێوان سەرۆکایەتی کۆمار و ئەنجومەنی نوێنەران، کە لەم نێوەندەدا سەرۆکایەتی کۆمار بەردەوامە لە کارەکانی بۆ پێشکەشکردنی ئەو پرۆژەیاسایانەی پەیوەستن بە پێداویستی و خواستی هاووڵاتیانەوە.

هەر لە دیدارەکەدا گفتوگۆکرا لەسەر کاراکردنی بڕگەکانی یاسای کچان و ژنانی رزگاربوی ئێزدی، لەم بارەیەوە سەرۆكکۆمار جەختیکردەوە لە گرنگی هەماهەنگی و هاریکاری نێوان نوێنەرانی پێکهاتەکان لەکاتێکدا ئەگەر پێویستبو گۆڕانکاری لە بڕگەکانی یاساکەدا بکرێت.

سەبارەت بە دۆسێی ئاوارەکانیش، سەرۆك کۆمار ئاماژەیکرد بە پێویستی کۆتاییهێنان بە دۆسییەکە بە گەڕانەوەی ئاوارەکان بۆ زێدی خۆیان لە دوای نۆژەنکردنەوەی ناوچەکانیان، سەرەڕای پاڵپشتیکردن لە رێوشوێنەکانی حکومەت بۆ داخستنی کامپی ئاوارەکان لە کۆتایی مانگی تەمموزی داهاتودا.

لای خۆیەوە مەلا کەریم شکور پاڵپشتی خۆی بۆ پێشنیارەکانی سەرۆک کۆمار دەربڕی و جەختیکردەوە لە بایەخی هاریکاری نێوان سەرۆکایەتی کۆمار و ئەنجومەنی نوێنەران بۆ دەرکردنی یاسا پێویستەکان و کاری هاوبەش بۆ گەڕانەوەی ئاوارەکان بۆ زێدی خۆیان.

PUKMEDIA