وتەبێژ: یەکێتی سکاڵاکەی لەسەر هەڵبژاردن ناکشێنێتەوە

PUKMEDIA

دادگای باڵای فیدراڵی

سبەینێ 11-2-2024 یەک شەممە جارێکیتر دادگای باڵای فیدراڵی لە عیراق سەبارەت بە سكاڵایەكی یەكێتی تایبەت بە یاسای هەڵبژاردن لە هەرێمی كوردستان کۆدەبێتەوە و وتەبێژی یەکێتیش رایدەگەیەنێت: "یەکێتی سکاڵاکەی ناکشێنێتەوە".

وتەبێژی یەکێتی: یەکێتی سکاڵاکەی ناکشێنێتەوە

دادگای باڵای فیدراڵی لە عیراق سەبارەت بە یاسای هەڵبژاردن لە هەرێمی كوردستان کۆدەبێتەوەو سەعدی ئەحمەد پیرە وتەبێژی یەکێتیی نیشتمانیی کوردستانیش لە نوێترین لێدوانیدا رایگەیاندووە: "یەکێتی سکاڵاکەی لەسەر یاسای هەڵبژاردن ناکشێنێتەوەو ئەو یاسایەی کە ئێستا کاری پێدەکرێت نایەکسانە و پێویستە کۆتاکان لە هەڵبژاردنەکاندا نوێنەری راستەقینەی خۆیان بکەن و بۆ لایەنەکانی دیکە بەکارنەهێنرێن".

سکاڵاکە لەسەر پێنج ماددەیە

سكاڵاکەی یەكێتیی نیشتمانیی كوردستان تایبەتە بە پێنج ماددە لە یاسای هەڵبژاردنی پەرلەمانی كوردستان، كە لەلایەن زیاد جەبار سەرۆكی فراكسیۆنی یەکێتیی نیشتمانیی کوردستان لە خولی پێنجەمی پەرلەمانی كوردستان لەسەر ماددەكانی (1-9-15-22-36)ی یاسای هەڵبژاردنەكانی پەرلەمانی كوردستان تۆماركراوە.

پێشتریش چەند جارێكی دیكە دانیشتنەكەی دادگای فیدراڵی بۆ تاوتوێكردنی سكاڵایەكی یەكێتی تایبەت بە یاسای هەڵبژاردن لە هەرێمی كوردستان دواخراوە.

هەروەها یەكێتی لەرێگەی ئەم سكاڵایەوە دەیەوێت بۆ هەڵبژاردنی داهاتووی پەرلەمانی كوردستان، كار بە یاسای ئەنجومەنی نیشتمانی كوردستانی عیراق بكرێت، كە ساڵی 1992 لەلایەن بەرەی كوردستانییەوە دەركراوە.

PUKMEDIA