سەرۆك بافڵ: مام بەبەڵگەی مێژوویی كوردستانیبوونی كەركوكی سەلماند

ئەرشیف

مورافەعە گەورەكەی سەرۆك مام جەلال

لە یادی ٢٠ ساڵەی مورافەعە گەورەكەی سەرۆك مام جەلال لە ئەنجومەنی حوكم، بافڵ جەلال تاڵەبانی سەرۆكی یەكێتیی نیشتمانیی كوردستان پەیامێكی بڵاوكردەوە و رایگەیاند: "كەركوكی قودسی كوردستان بەشێكی گەورە و گرنگی خەباتی سیاسیی سەرۆك مام جەلال بوو، ئەمڕۆش ئێمە بە هەمان وزە و رۆحییەتەوە درێژە بەو سیاسەتە دەدەین".

دەقی پەیامەكە:

ئەمڕۆ بە شانازییەوە یادی ٢٠ ساڵەی مورافەعە مێژووییەكەی سەرۆك مام جەلال لە ئەنجوومەنی حوكم دەكەینەوە، یادی ئەو رۆژەی سەرۆك و رابەرمان بە نەخشە و بەڵگەی مێژووییەوە كوردستانیبوونی كەركوكی سەلماندەوە.

كەركوكی قودسی كوردستان بەشێكی گەورە و گرنگی خەباتی سیاسیی سەرۆك مام جەلال بوو، ئەمڕۆش ئێمە بە هەمان وزە و رۆحییەتەوە درێژە بەو سیاسەتە دەدەین و خەبات لەپێناو سەربەرزیی و سەرفرازیی كەركووك و خەڵكە تێكۆشەرەكەیدا دەكەین.

یەكێتیی نیشتمانیی كوردستان هەمیشە لە كەركووك و لەناو دڵی خەڵكە خۆڕاگرەكەیدا بووە، خەمی كەركوك خەمی ئێمەیە و گەیشتن بە مافە یاسایی و دەستوورییەكانیشی لە ئەستۆی ئێمەیە. 

ئێمە دەمانەوێت كەركوك وەك هەمیشە نموونەی باڵای ئاشتەوایی و پێكەوەژیان بمێنێتەوە و خەباتیشی بۆ دەكەین، كەركوك ئەو شارە بێت كە هەموو دانیشتووانەكەی بەسەرجەم نەتەوە و پێكهاتەكانەوە دوور لە ناكۆكی، بە خۆشەویستی و بەرپرسیارێتییەوە كار بۆ داهاتوویەكی پرشنگدارتر بكەن و كەركوك ببێتەوە بەو شارەی هەمووان خەونی پێوەدەبینن.


بافڵ جەلال تاڵەبانی 
سەرۆكی یەكێتیی نیشتمانیی كوردستان

PUKMEDIA