داوای تەواوبوونی بەپارێزگابوونی هەڵەبجە دەکرێت

PUKMEDIA

هەڵەبجە

ئەندامێکی فراکسیۆنی یەکێتی لە ئەنجومەنی نوێنەرانی عیراق داوادەکات خوێندنەوەی سێهەم بۆ پڕۆژەیاسای بەپارێزگابوونی هەڵەبجە بخرێتە کارنامەی دانیشتنەکانی پەرلەمانەوە و بەیاسا بەپارێزگابوونی هەڵەبجە بناسێندرێت.

فراکسیۆنی یەکێتی بە مەرج دەنگ بە سەرۆکی نوێی پەرلەمان دەدات

چرۆ حەمەشەریف ئەندامی ئەنجومەنی نوێنەرانی عیراق لە فراکسیۆنی یەکێتیی نیشتمانیی کوردستان بە سایتی رەسمی یەکێتی PUKMEDIA ی راگەیاند: "بەنووسراوی رەسمی داوام لە سەرۆکی پەرلەمان بە وەکالەت کردووە کە بەپارێزگابوونی هەڵەبجە بخرێتە دانیشتنەکانی داهاتووی ئەنجومەنی نوێنەرانەوە، بۆئەمەش لەهەوڵداین کە زۆرترین دەنگ بۆ  پڕۆژەیاسای بەپارێزگابوونی هەڵەبجە کۆبکەینەوە و پڕۆژەکە دەنگی پێویست بەدەستبهێنێت".

"فراکسیۆنی یەکێتی بۆ دەنگدان بە سەرۆکی نوێی پەرلەمان مەرجی هەیە، کە یەکێک لە مەرجەکانمان تەواوکردنی پڕۆسەی بەپارێزگابوونی هەڵەبجەیە و دەنگدانە لەسەر پڕۆژەکە"، چرۆ حەمەشەریف وادەڵێت.

بەپارێزگابوونی هەڵەبجە چاوەڕوانی خوێندنەوەی سێهەمە

پێشتر لەسەر داوای فراکسیۆنی یەکێتی پڕۆژەی بەپارێزگابوونی هەڵەبجە خرایە کارنامەی دانیشتنەکانی پەرلەمانەوە و خوێندنەوەی یەکەم و دووەمی بۆکرا، بەڵام بۆ خوێندنەوەی سێهەم و کۆتایی پڕۆژەکە، بە بڕیاری محەمەد حەلبوسی سەرۆکی پێشووی پەرلەمانی عیراق دواخرا و تائێستا نەتوانراوە خوێندنەوەی سێهەمی بۆبکرێت.

سەرۆک بافڵ: بەپارێزگابوونی هەڵەبجە دەستکەوتێکی بچوكە بۆ هەڵەبجەییەکان

پێشتر لە سەردانەکانیدا بۆ بەغدا و کۆبوونەوەی لەگەڵ سەرکردە عیراقییەکاندا، سەرۆک بافڵ تیشکی خستووەتە سەر پرسی بە پارێزگابوونی هەڵەبجە و سەرۆكی یەكێتیی نیشتمانیی کوردستان بە سەركردە عیراقییەكانی راگەیاندووە: "بەپارێزگابوونی هەڵەبجە دەستكەوتێكی بچوكە بۆ ئەو قوربانییە گەورەیەی هەڵەبجەییەكان لەپێناو عیراقێكی دیموكراسیدا داویانە و پێویستە لایەنە عیراقییەكان لەگەڵ لایەنە كوردستانییەكان ئەو پرسە لە بەرژەوەندی هەڵەبجەییەكان كۆتایی پێبهێنن".

ئەمەش لەکاتێکدایە 154 ساڵ بەسەر بە قەزابوونی هەڵەبجەدا تێدەپەڕێت كە مێژووەكەی بۆ ساڵی 1869 دەگەڕێتەوە، هەروەها رژێمی دیکتاتۆری پێشووی عیراق لە ساڵی 1988 دا، گەورەترین تاوانی کۆمەڵکوژی و جینۆسایدی بەرامبەر بە هەڵەبجەییەکان ئەنجامدا کە کیمیابارانکردنی شارەکە بوو کە تێیدا زیاتر لە پێنج هەزار کەس شەهیدبوون.
PUKMEDIA