كۆنفرانسی نوێنه‌رایه‌تییه‌كانی حكومه‌تی هه‌رێم ده‌ستپێده‌كات

PUKMEDIA

لۆگۆی حکومەتی هەرێم

سبه‌ینێ كۆنفرانسی نوێنه‌رایه‌تییه‌كانی حكومه‌تی هه‌رێمی كوردستان له‌ ده‌ره‌وه‌ی وڵات ده‌ستپێده‌كات و ماوه‌ی چوار رۆژ ده‌خایه‌نێت و ژماره‌یه‌كی زۆر له‌كونسوڵ و دیپلۆماتكار و نوێنه‌رانی حكومه‌ت له‌ ده‌ره‌وه‌ی وڵات به‌شداری تێدا ده‌كه‌ن.

حكومه‌تی هه‌رێم په‌یوه‌ندییه‌كانی ده‌ره‌وه‌ رێكده‌خاته‌وه‌

دابان شه‌ده‌ڵه‌ جێگری لێپرسراوی فه‌رمانگه‌ی په‌یوه‌ندییه‌كانی ده‌ره‌وه‌ی هه‌رێم به‌سایتی ره‌سمی یه‌كێتیی نیشتمانیی كوردستان به‌ PUKMEDIA ی راگه‌یاند:" سێهه‌مین كۆنفرانسی په‌یوه‌ندییه‌كانی ده‌ره‌وه‌ی حكومه‌تی هه‌رێم ئه‌نجامده‌درێت و سه‌رۆك و جێگری سه‌رۆك وه‌زیرانی هه‌رێم به‌شداری تێدا ده‌كه‌ن و چوار رۆژ ده‌خایه‌نێت".

"ئامانجی كۆنفرانسه‌كه‌ش رێكخستنه‌وه‌ی كاری دیپلۆماسی حكومه‌تی هه‌رێمە له‌گه‌ڵ قۆناغه‌كه‌دا و دانانی پلانی ستراتیجییه‌ بۆ نوێنه‌رایه‌تییه‌كان و بایه‌خدان و قوڵتر كردنه‌وه‌ی په‌یوه‌ندییه‌ دیپلۆماسییه‌كانه‌ له‌گه‌ڵ وڵاتان"، دابان شه‌ده‌ڵه‌ واده‌ڵێت.

كونسوڵی وڵاتان به‌شدار ده‌بن

له‌هه‌رێمی كوردستاندا 41 كۆنسوڵخانه‌و نوێنه‌ری وڵاتان هه‌یه‌ كه‌ دوو نوێنه‌رایه‌تی ئه‌فریكا و دوو نوێنه‌رایه‌تی ئه‌مریكا و 10 نوێنه‌رایه‌تی ئاسیا و باسفینك و 20 دانه‌ی دیكه‌شیان ئه‌وروپا و 7 دانه‌ی دیكه‌ش رۆژهه‌ڵاتی ناوه‌ڕاسته‌ كه‌ سبه‌ینێ 28-1-2024  له‌ئاستی كونسوڵ و دیپلۆماتكار به‌شداری له‌ كۆنفراسی په‌یوه‌ندییه‌كانی هه‌رێمدا ده‌كه‌ن.

دابان شه‌ده‌ڵه‌ ده‌ڵێت:" له‌ كۆنفرانسه‌كه‌دا چه‌ندین بابه‌ت و پرسی دیپلۆماسی ده‌خرێنه‌ڕوو كه‌ هه‌ندێكیان په‌یوه‌نددارن به‌ ئابووری و بازرگانی و وه‌به‌رهێنانه‌وه‌ بۆ ئه‌وه‌ش له‌ حكومه‌تی هه‌رێم لایه‌نی په‌یوه‌ندیدار ئاماده‌ده‌بن".

"په‌یوه‌ندییه‌ دیپلۆماسییه‌كان له‌لایه‌ن حكومه‌تی هه‌رێم بایه‌خی تایبه‌تی پێده‌درێت تاوه‌كو بتوانرێت ره‌نگدانه‌وه‌ی له‌سه‌ر كه‌رته‌كانی بازرگانی و ئابووری و وه‌به‌رهێنان و كشتوكاڵیش هه‌بێت كه‌ ئه‌مه‌ هاندان و سه‌رنج راكێشانی سه‌رمایه‌گوزارییه‌ بۆ هه‌رێم" جێگری لێپرسراوی فه‌رمانگه‌ی په‌یوه‌ندییه‌كانی ده‌ره‌وه‌ی هه‌رێم واده‌ڵێت.

نوێنه‌رانی ده‌ره‌وه‌ی حكومه‌ت له‌كۆنفرانسه‌كه‌ ده‌بن

حكومه‌تی هه‌رێمی كوردستانیش بۆ په‌ره‌پێدان و پته‌وكردنی په‌یوه‌ندییه‌ دیپلۆماسییه‌كانی كورد له‌گه‌ڵ وڵاتانی ده‌ره‌وه‌ 14 نوێنه‌رایه‌تی حكومه‌تی له‌ وڵاتانی ئاسیا و ئه‌وروپا و جیهانی عه‌ره‌بیدا كردوه‌ته‌وه‌و سبه‌ی سه‌رجه‌مان له‌كۆنفراسه‌كه‌ ده‌بن.

دابان شه‌ده‌ڵه‌ قۆناغی په‌ره‌پێدانی په‌یوه‌ندییه‌ دیپلۆماسییه‌كان بۆ كورد و حكومه‌تی هه‌رێم به‌ بایه‌خ ده‌زانێت و ده‌ڵێت:" له‌ كۆنفرانسه‌كه‌دا به‌ وردی باس له‌ ستراتیژو په‌ره‌پێدانی ئه‌و په‌یوه‌ندییه‌ دیپلۆماسییانه‌ ده‌كرێت و هه‌وڵده‌ده‌ین كۆنفرانسه‌كه‌ ببێته‌ نه‌ریتێكی دیپلۆماسی بۆ خۆرێكخستنه‌وه‌".

" پرسی ئه‌منیه‌ت و هه‌ڕه‌شه‌ی درۆن و ئاڵنگارییه‌كان و دۆزینه‌وه‌ی چاره‌سه‌ری دیپلۆماسی و زاڵكردنی زمانی دیالۆگ بابه‌تی گرنگی كۆنفرانسه‌كه‌ ده‌بن" دابان شه‌ده‌ڵه‌ واده‌ڵێت.

به‌گوێره‌ی ئه‌و زانیارییانه‌ی ده‌ست PUKMEDIA كه‌وتوون، سبه‌ینێ 41 كۆنسوڵ و ژماره‌یه‌ك له‌ دیپلۆماتكارو نوێنه‌ری ئاژانسی نێوده‌وڵه‌تی و 14 نوێنه‌ری حكومه‌تی هه‌رێم له‌ ده‌ره‌وه‌ ئاماده‌ی كۆنفرانسه‌كه‌ ده‌بن.

PUKMEDIA