نوێنەران بەبێ سەرۆک دەمێنێتەوە

PUKMEDIA

ئەنجومەنی نوێنەرانی عیراق

تۆمه‌تباركردنی شه‌علان كه‌ریم كاندید بۆ سه‌رۆكی په‌رله‌مان، ئه‌نجومه‌نی نوێنه‌رانی عیراق به‌بێ سه‌رۆك ده‌كات، تا یه‌كلا كردنه‌وه‌ی تۆمه‌ته‌كانیش له‌لایه‌ن دادگای فیدراڵییه‌وه‌ موحسین مه‌نده‌لاوی ئه‌ركی سه‌رۆكی په‌رله‌مان له‌ ئه‌ستۆ ده‌گرێت.

خاڵی یه‌كه‌می كارنامه‌ی دانیشتنی ئه‌مڕ‌ۆ 27-1-2024 ی ئه‌نجومه‌نی نوێنه‌رانی عیراق هه‌ڵبژاردنی سه‌رۆكێكی نوی بوو بۆ په‌رله‌مان، به‌ڵام له‌م دانیشتنه‌شدا هه‌ڵنه‌بژێردرا.

هه‌ڵبژاردنی سه‌رۆكی په‌رله‌مان دواخرا

د.نه‌رمین معروف غفور ئه‌ندامی لیژنه‌ی دارایی  له‌ ئه‌نجومه‌نی نوێنه‌رانی عیراق به‌ سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند: "ئه‌مڕ‌ۆ دووه‌مین دانیشتنی ئاسایی ئه‌نجومه‌نی نوێنه‌رانی عیراق به‌ ئاماده‌بوونی 180 په‌رله‌مانتار به‌ڕ‌ێوه‌چوو، كه‌ به‌پێی كارنامه‌ی دانیشتنه‌كه‌ بڕ‌گه‌ی یه‌كه‌م تایبه‌تبوو به‌ هه‌ڵبژاردنی سه‌رۆكی ئه‌نجومه‌نی نوێنه‌ران، به‌ڵام دواخرا بۆ دوای یه‌كلابوونه‌وه‌ی بڕ‌یاری دادگای فیدڕ‌اڵی له‌باره‌ی ئه‌و سكاڵایانه‌ی كرابوون له‌سه‌ر ئه‌م پرسه‌ له‌دانیشتنی رابردوودا".

دواخستی هه‌ڵبژاردنی سه‌رۆكی په‌رله‌مانی خرایه‌ ده‌نگدانه‌وه‌

هه‌ر له‌و باره‌یه‌وه‌ د.بڕ‌یار ڕ‌ه‌شید ئه‌ندامی ئه‌نجومه‌نی نوێنه‌رانی عیراق له‌ فراكسیۆنی یه‌كێتی به‌ سایتی ره‌سمی یه‌كێتیی نیشتمانی كوردستان PUKMEDIA ی راگه‌یاند: "دوای ئه‌وه‌ی سه‌رۆكی په‌رله‌مانی كاربه‌ڕ‌ێكه‌ر پرسی دواخستی هه‌ڵبژاردنی سه‌رۆكی نوێی په‌رله‌مانی خسته‌ ده‌نگدانه‌وه‌، هه‌تا یه‌كلابونه‌وه‌ی سكاڵاكان له‌ دادگای فیدراڵی، به‌زۆرینه‌ی ده‌نگ هه‌ڵبژاردنی سه‌رۆكێكی نوێ بۆ په‌رله‌مان دواخرا".

په‌رله‌مان چاوه‌ڕێی دادگای فیدراڵییه‌

په‌رله‌مانی عیراق رۆژی  13-01-2024  كۆبوونه‌وه‌ی خۆی كرد بۆ  هه‌ڵبژاردنی سه‌رۆكی نوێی په‌رله‌مان كه‌ به‌ ئاماده‌بوونی 314 په‌رله‌مانتار به‌ڕ‌ێوه‌چوو و موحسین مه‌نده‌لاوی جێگری یه‌كه‌می سه‌رۆكی په‌رله‌مان سه‌رۆكایه‌تی كردو تێیدا شه‌علان كه‌ریم؛ 152 ده‌نگ و سالم عیساوی 97 ده‌نگی به‌ده‌ستهێنا، هه‌ریه‌ك له‌ مه‌حمود مه‌شهه‌دانیش 48 ده‌نگ و عامر عه‌بدولجه‌بار 6 ده‌نگ و ته‌ڵاڵ زه‌وبه‌عی 1 ده‌نگ-یان به‌ده‌ستهێنا و 10 ده‌نگی پووچه‌ڵیش هه‌بوو.

چوار سكاڵا هۆكاری پەكخستنی هەڵبژاردنی سەرۆكی پەرلەمانە، كە  سێ سکاڵایان تایبەتن بە شەعلان كەریم كاندیدی حزبی تەقەدوم بە سەرۆکایەتی محەمەد حەلبوسی، بەوپێیەی " داوا لەدگا كراوە كە ئەو كاندیدە بە نا دەستووری لە قەڵمە بدات لەسەر مەرجەكانی كاندیتێی و   مافی پەرلەمانتاری لێوەربگیرێتەوە".

سکاڵاكە دیكەش  داوا لە دادگا کراوە، بڕیار لە نادەستووریبوونی دانیشتنی رۆژی 13ـی کانوونی دووەمی ئەنجوومەنی نوێنەران بدات، کە تایبەت بوو بە هەڵبژاردنی سەرۆکی ئەنجوومەنی نوێنەران.

PUKMEDIA