سەرۆکایەتی هەرێم و کۆمسیۆن وادەیەکی نوێ بۆهەڵبژاردن دیاریدەکەن

PUKMEDIA

وتەبێژی سەرۆکایەتی هەرێم و سەرۆکی کۆمسیۆنی باڵای سەربەخۆی هەڵبژاردنەکانی عیراق

سەرۆکایەتی هەرێم و وەفدی باڵای کۆمسیۆنی عیراق لە هەولێر کۆبونەوەو هاوڕابوون لە بارەی دیاریکردنی کاتێکی دیکە بۆ هەڵبژاردنی پەرلەمانی کوردستان.

لەپاش کۆبونەوەکە حاکم عومەر ئەحمەد سەرۆکی کۆمسیۆنی باڵای سەربەخۆی هەڵبژاردنەکانی عیراق لە کۆنگرەیەکی رۆژنامەوانیدا رایگەیاند: "لەگەڵ ئەوەی ئامادەکاریمان کردووە بۆ هەڵبژاردنی پەرلەمانی کوردستان، بەڵام ناتوانین لەو وادەیەی کە سەرۆکی هەرێم دیاری کردووە کە ٢٥ی شوباتە هەڵبژاردن ئەنجام بدەین، لەم روانگەیەشەوە وەفدی سەرۆکایەتی هەرێممان پێشتر ئاگادار کردوەتەوەو ئەمڕۆش لە کۆبونەوەکەماندا هەردوولا هاوڕابووین کە وادەیەکی نوێ بۆ هەڵبژاردنی پەرلەمانی کوردستان دیاری بکەین".

"هەر سکاڵایەک لەبارەی هەڵبژاردنی پەرلەمانی کوردستان هەبێت کۆمسیۆن بێ لایەنانە مامەڵەی لەگەڵدا دەکات و بەڕەسمی وەڵامی خۆمان دەدەینەوە لایەنە پەیوەندیدارەکان، دواخستنی هەڵبژاردنی پەرلەمانی کوردستانیش لەپێناو ئەوەدایە کە کۆمسیۆن بتوانێت هەڵبژاردنێکی پاک و بێگەرد و بێ کێشەی تەکنیکی بەڕێوەببات"، حاکم عومەر وای وت.

دڵشاد شەهاب وتەبێژی سەرۆکایەتی هەرێم رایگەیاند: "دواخستنی هەڵبژاردنی پەرلەمانی کوردستان لەدەرەوەی دەسەڵاتی سەرۆکایەتی هەرێم و کۆمسیۆنی باڵای سەربەخۆی هەڵبژاردنەکانی عیراقە و لەگەڵ کۆمسیۆن هاوڕابوین کە وادەیەکی نوێ بۆ هەڵبژاردنی پەرلەمان دیاری بکرێت".

"گفتوگۆکانمان لەگەڵ وەفدی کۆمسیۆنی عیراق لەسەر بنەمای باشتر بەڕێوەبردنی هەڵبژاردنی پەرلەمانی کوردستان بوەو لەم روانگەیەشەوە هەردوولامان هەوڵەکانمان دەخەینە گەڕ بۆ ئەوەی هەڵبژاردنێکی پاک و بێگەرد و بێ کێشە بەڕێوەبچێت"، دڵشاد شەهاب وای وت.

PUKMEDIA