رووفاتی زیاتر لە 170 ئەنفالکراو دەگەڕێنەوە خاکی هەرێم

PUKMEDIA

رووفاتی 172 ئەنفالکراو دەگەڕێنەوە هەرێمی کوردستان

ئەمڕۆ شەممە 13-1-2024، رووفاتی زیاتر لە 170 ئەنفالکراوانی چەمچەماڵ دەگاتەوە خاکی پیرۆزی کوردستان و لە مەراسیمێکی شایستەدا بەخاک دەسپێردرێنەوە.

رەمەک رەمەزان قائیمقامی قەزای چەمچەماڵ و ئامادەبووی مەراسیمی بەڕێکردنی رووفاتی ئەنفالکراوان لە بەغداوە بۆ خاکی هەرێمی کوردستان لە لێدوانێکی تایبەتدا بە سایتی رەسمی یەکێتیی نیشتمانیی کوردستان PUKMEDIA ی راگەیاند: "ئەمڕۆ بە ئامادەبوونی خاتوو شاناز ئیبراهیم ئەحمەد خانمی یەکەمی عیراق، لە مەراسیمێکی شایستەدا رووفاتی 172 ئەنفالکراوان لە بەغدای پایتەختی عیراقەوە بەرەو خاکی پیرۆزی کوردستان بەڕێکران".

"ئەو رووفاتانەی کە ئەمڕۆ دەگەڕێنەوە خاکی هەرێمی کوردستان، بەشێکی زۆری رووفاتەکان دەگەڕێنەوە سنووری چەمچەماڵ و لە رۆژانی داهاتوودا لە مەراسیمێکدا کە شایستەی باڵای رووفاتەکان بێت بەخاک دەسپێردرێنەوە، وەک قائیمقامییەتی چەمچەماڵ و بەڕێوەبەرایەتی مۆنۆمێنتی ئەنفال سوپاسی خانمی یەکەمی عیراق و لایەنە پەیوەندیدارەکان دەکەین کە رۆڵی بەرچاوی بینی لە گەڕانەوەی رووفاتەکان". قائیمقامی چەمچەماڵ وای وت.

ئەو روفاتانە ناسنامەیان ناسراوەتەوەو پزیشکی دادی بەغدا رێکارە یاساییەکانی خۆی گرتوەتە بەر، بەڵام پشکنینی DNA بۆ کەسوکاری ئەنفالکراوەکان کە ئەرکی حکومەتی هەرێم و وەزارەتی شەهیدانە نەکراوە.

بەپێی ئامارەکان لەدوای ئازادکردنی عیراقەوە 270 گۆڕی بەکۆمەڵ هەڵدراونەتەوە، لەکاتێکدا دەیان گۆڕی بەکۆمەڵی دیکە ماون و هێشتا هەڵنەدراونەتەوە کە بەشی زۆریان دەکەونە سێگۆشەی نێوان پارێزگاکانی دیوانیە و سەماوە و نەجەف.

PUKMEDIA