سەرۆککۆماری عیراق ئەستۆپاکی دارایی دەکات

PUKMEDIA

د. لەتیف رەشید سەرۆککۆماری عیراق

د. لەتیف رەشید سەرۆککۆماری عیراق فۆرمی ئەستۆپاکی دارایی خۆی پێشکەشی دەستەی دەستپاکی عیراق دەکات.

بەگوێرەی راگەیەنراوێکی نوسینگەی پەیوەندی و راگەیاندنی حکومی لە دەستەی دەستپاکی عیراق کە وێنەیەکی دەست PUKMEDIA کەوتووە ئاشکرایدەکات، کە فۆرمی ئەستۆپاکی دارایی د. لەتیف رەشید سەرۆککۆماری عیراقیان بەدەست گەیشتووە.

دوو وەزیرەكەی یەكێتی ئەستۆپاكی خۆیان راگەیاند

پێشتریش د.خالید شوانی وەزیری داد و نزار ئامێدی وەزیری ژینگە لە حكومەتی عیراق كە لەسەر پشكی یەكێتیی نیشتمانیی كوردستانن، وەك دەستپێشخەرییەك لە ئەنجومەنی وەزیران ئەستۆپاكی دارایی خۆیان پێشكەش بە دەستەی دەستپاكی فیدراڵی كرد.

كێن ئەوانەی دەبێت فۆڕمی ئەستۆپاكی پڕبكەنەوە؟

هەروەها لە ماددەی 17ی یاسای دەستەی دەستپاكی ژمارە 30ی ساڵی 2011 دا ئاماژە بەوەدراوە، هەر كەسێك لە پۆستەكانی سەرۆككۆمار و جێگرەكانی، ئەندامانی دەسەڵاتی یاسادانان (پەرلەمانتاران)، سەرۆكوەزیران و جێگرەكانی و وەزیرەكان و ئەو كەسانەی پلەی وەزیریان هەیە، لەگەڵ بریكاری وەزیرەكان و فەرمانبەرانی پلە تایبەت و سەرۆكی ئەنجومەنی باڵای دادوەری و دادوەران، هەروەها سەرۆك و سەرۆكوەزیرانی هەرێم و پەرلەمانتاران و دادوەران و وەزیرەكان و بریكارانی وەزیر و پارێزگارەكان و ئەندامانی ئەنجومەنی پارێزگاكان و سەرۆكی دەستە سەربەخۆكان و بریكار و ئەندامەكانی، لەگەڵ باڵیۆز و كونسوڵ و پاشكۆكانیان، فەرماندەی فەیلەق و فیرقە سەربازییەكان و سەرۆكی دەزگا ئەمنییەكان، بەڕێوەبەرە گشتییەكان و ئەوانەی لە پلەی بەڕێوەبەری گشتیدان، هەروەها ئەفسەرانی هێزە سەربازییەكان و هێزەكانی ئاسایشی ناوخۆ لە پلەی موقەدەم زیاتر، لەگەڵ هەر كەسێك كە دەستەی دەستپاكی بە پێویستی بزانێت داهات و سەرمایەكەی ئاشكرا بكات، پێویستە فۆڕمی دەستەی دەستپاكی پڕبكەنەوە.

PUKMEDIA