هەڵبژاردنی پەرلەمانی كوردستان دوادەخرێت

PUKMEDIA

لۆگۆی كۆمسیۆنی باڵای سەربەخۆی هەڵبژاردنەكانی عیراق

عومەر ئەحمەد محەمەد سەرۆكی ئەنجومەنی كۆمسیۆنی باڵای سەربەخۆی هەڵبژاردنەكانی عیراق وەڵامی سەرۆكایەتی هەرێمی كوردستان دەداتەوە سەبارەت بە بەڕێوەبردنی هەڵبژاردنی پەرلەمانی كوردستان لەو وادەیەی دیاریكراوە.

لەو وەڵامە رەسمییەدا كە وێنەیەكی دەست سایتی رەسمی یەكێتیی نیشتمانیی كوردستان PUKMEDIA كەوتووە و رۆژی 2ی1ی2023 ئاڕاستەی دیوانی سەرۆكایەتی هەرێم كراوە، رایدەگەیەنێت: "ئەو مەرسومەی رۆژی 25ی2ی2024 ی بۆ وادەی هەڵبژاردنی پەرلەمانی كوردستان دياریكردووە، ناتواندرێت لەو وادەیەدا بكرێت بەو پێیەی پێویستی بەئامادەكاری و كاتی گونجاوی پێشوەختە بەپێی خشتەی ئامادەكاری هەبێت" و بەپێی ئەو وەڵامەی سەرۆكی كۆمسیۆن وادەی دیاریكراو یارمەتیدەری ئەنجامدانی هەڵبژاردنی پەرلەمانی كوردستان نییە لە 25ی2ی ئەمساڵدا.

هەربەگوێرەی نووسراوەكە، كۆمسیۆن هۆكاری دواخستنەكە دەگێڕێتەوە بۆ رێكارە ژمێریارییەكانی وەزارەتی دارایی پەیوەندیدار بە پارەداركردن كە رێگربووە لە جێبەجێكردنی خشتەكەی كۆمسیۆن سەبارەت گرێبەستكردن و كڕینی پێداویستییەكانی هەڵبژاردن.

سەرۆكی كۆمسیۆنی باڵای سەربەخۆی هەڵبژاردنەكانی عیراق پێشنیاز دەكات: "وادەیەكی نوێ بۆ هەڵبژاردنی پەرلەمانی كوردستان دیاری بكرێت و هاوئاهەنگی لەگەڵ كۆمسيۆنی باڵای سەربەخۆی هەڵبژاردنەكان بكرێت بۆ ئەوەی هەڵبژاردنێكی سەركەوتو  لە هەمو رویەكەوە بەڕێوەببرێت  بۆ هەڵبژاردنی پەرلەمانی كوردستان".

بەپێی ئەو وەڵامەی سەرۆكی ئەنجومەنی كۆمسيۆنی سەربەخۆی باڵای هەڵبژاردنەكانی عیراق بێت، هەڵبژاردنی پەرلەمانی كوردستان دوادەخرێت بۆ ئەوكاتەی كە وادەیەكی نوێ دیاریدەكرێت.

PUKMEDIA

دەقی وەڵامەكەی كۆمسیۆنی سەربەخۆی هەڵبژاردنەكانی عیراق بۆ سەرۆكایەتی هەرێمی كوردستان: