سەعدی ئەحمەد پیرە: لەساڵی نوێدا هەوڵی باشتركردنی گوزەرانی خەڵك بدرێت

ئەرشیف

سەعدی ئەحمەد پیرە وتەبێژی یەکێتی

سەعدی ئەحمەد پیرە وتەبێژی یەكێتی نیشتیمانی كوردستان بەبۆنەی هاتنی ساڵی نوێ‌ (2024)، لە پەیامێکدا پیرۆزبایی لە گەلی كوردستان و هەموو بەشەكانی كوردستان ‌دەکات.

دەقی پەیامەکە:

بەبۆنەی هاتنی ساڵی نوێ‌ (2024)، پیرۆزبایی لە گەلی كوردستان دەكەین، لەهەموو بەشەكانی كوردستان ‌و لەهەر شوێنێكی جیهاندان، ئومێدەوارین سەری ساڵێكی ئاسودەو بەختەوەر بەرینەسەر. 

 پیرۆزبایی لە كەسوكاری سەربەرزی شەهیدان و پێشمەرگە قارەمانەكانی كوردستان ‌دەكەین. 

هیوادارین لە ساڵی نوێ‌دا، یەكێتی ریزەكانی گەلەكەمان پتەوتربێت، هێزو لایەنە سیاسیەكانی كوردستانیش بەگیانی هەستكردن بە بەرپرسیارێتی دۆخەكە، كێشە سیاسیەكان چارەسەر بكرێ‌. بە یەكگرتوویی‌و تەبایی گەلەكەمان و لایەنە سیاسیەكان، هەنگاو بنرێ‌ بۆ چارەسەركردنی كێشە ناوخۆییەكانی هەرێم باشتركردنی ژیان و گوزەرانی كۆمەڵانی خەڵكی كوردستان ‌و زیاتر بوژانەوە و ئاوەدانكردنەوەی ژێرخان و سەرخانی هەرێمەكەمان


هەروەك هیواخوازین، لەم ساڵە نوێیەدا، بەرێگاچارەی گفتوگۆ و دانوستان، لەسەر بنەمای دەستوری هەمیشەیی عیراق ‌و تەوافقی نیشتمانی، كێشە و دۆسییە هەڵپەسێردراوەكانی نێوان هەرێم‌و ناوەند چارەسەری بنەڕەتی  بكرێن‌، هاوكات سەقامگیری سیاسی و  ئاشتی و تەبایی باڵ بەسەر ناوچەكەدا بكێشێت و لەسایەی دا تەواوی خەڵك بەهەموو پێكهاتەكانەوە بەئارامی و ئاسودەیی بژین. 

 جارێكی تر ساڵی نوێ‌ پیرۆزبێت‌و ئومێدی بەختەوەری بۆ گەلی كوردستان دەخوازین. 

سەعدی ئەحمەد پیرە 
وتەبێژی یەكێتی نیشتیمانی كوردستان 
٣١/١٢/٢٠٢٣

PUKMEDIA