سەرۆككۆمار: پیاوانی ئاینی رۆڵی گرنگیان لەبانگەشەكردن بۆ میانڕەوی هەیە

نوسینگەی راگەیاندنی سەرۆكایەتی كۆمار

د. لەتیف جەمال رەشید سەرۆككۆماری عیراق و دكتۆر محەمەد تیجانی بیرمەندی ئیسلامیی تونسی

د. لەتیف جەمال رەشید سەرۆككۆماری عیراق لە كۆشكی بەغدا پێشوازی لە دكتۆر محەمەد تیجانی بیرمەندی ئیسلامیی تونسی كرد.

لە دیدارەكەدا، كە رۆژی پێنج شەممە 28-12-2023 بەڕێوەچوو، سەرۆككۆمار بایەخی بڵاوكردنەوە و چەسپاندنی بنەماكانی ئاینی ئیسلامی دووپاتكردەوە، كە لەسەر لێبوردەیی و ئاشتی و خۆشەویستی و پێكەوەژیانی مرۆڤایەتی بنیاتنراوە.

هەروەها سەرۆككۆمار ئاماژەی بە پێشكەوتنە ئەرێنییەكانی وڵات كرد لەڕووی سەقامگیریی ئاسایش و پێشكەشكردنی خزمەتگوزارییەكان و باشبوونی ئاستی بژێویی هاووڵاتیان.

سەرۆككۆمار باسی لە رۆڵی گرنگی پیاوانی ئایینی كرد لە بانگەوازكردن بۆ چاكەكاری و لێبوردەیی و هاریكاری و پتەوكردنی رایەڵەكانی خۆشەویستی و پێكەوەیی لەنێوان رۆڵەكانی كۆمەڵگە، سەرەڕای بەرەوپێشبردنی بەها بەرزەكان، كە بانگەشە بۆ میانڕەوی دەكەن لەپاڵ نزیككردنەوەی ئایین و تایفە و كلتورە جیاوازەكان.

لەلایەن خۆیەوە، دكتۆر تیجانی بایەخی بەهێزكردنی ئەو هەوڵانەی دووپاتكردەوە، كە لەپێناو چەسپاندنی پێكەوەژیان و بنیاتنانی پردی متمانەی نێوان ئایینە جیاوازەكان دەدرێن. هەروەها سوپاسی رۆڵ و سوربونی سەرۆككۆماری كرد لەپێناو پتەوكردنی نزیكبونەوەی نێوان تایفە و ئایینەكان و دیدارە بەردەوامەكانی لەگەڵ پیاوانی ئایینی لە سەرجەم پێكهاتەكاندا.

PUKMEDIA