زیاد جەبار: یەکێتی دەیەوێت پێکهاتەکان نوێنەری راستەقینەی خۆیان بنێرنە پەرلەمان

PUKMEDIA

لێپرسراوی مەڵبەندی سلێمانی

لێپرسراوی مەڵبەندی سلێمانی دەڵێت: "یەکێتی لەگەڵ بەڕێوەچوونی هەڵبژاردنی پەرلەمانی کوردستانە لەوادەی خۆیدا و هەروەها تەئکیدیش دەکەینەوە کە پێویستە پێکهاتەکان نوێنەری راستەقینەی خۆیان هەبێت لە پەرلەمان".

زیاد جەبار لێپرسراوی مەڵبەندی سلێمانی یەکێتیی نیشتمانیی کوردستان لە کۆنگرەیەکی رۆژنامەوانیدا لەبارەی ئەنجامدانی هەڵبژاردنی پەرلەمانی کوردستانەوە رایگەیاند: "یەکێتیی نیشتمانیی کوردستان لەگەڵ ئەوەدایە هەڵبژاردنی پەرلەمانی کوردستان لەوادەی خۆیدا ئەنجام بدرێت کە رۆژی ٢٥ی شوباتی ٢٠٢٤ ە".

"جیاوازی یەکێتی لەگەڵ سەرجەم هێزە سیاسییەکانی کوردستان و بەتایبەت پارتی دیموکراتی کوردستان ئەوە بووە لەسەرەتای خولی پێنجەمی پەرلەمانی کوردستانەوە بەردەوام جەختمان لەوە کردوەتەوە لەهەر ناوچەیەکی هەرێمی کوردستان هەر پێکهاتەیەک هەبێت خۆیان نوێنەرایەتی راستەقینەی خۆیان بکەن لە پەرلەمانی کوردستان و دەشمانەوێت مەسیحییەکانی سلێمانیش نوێنەری خۆیان هەبێت لە پەرلەمانی کوردستان"، زیاد جەبار وای وت.

لێپرسراوی مەڵبەندی سلێمانی لەبارەی سکاڵاکەنشیان کەلە خولی پێنجەمی پەرلەمان لەبارەی پێنج ماددە لە یاسای هەڵبژاردن کە ئاڕاستەی دادگای فیدراڵییان کردبوو رایگەیاند: "بەو هیوایەین بڕیاری دادگای فیدراڵی کە لە ٢٧ی ئەم مانگە دەدرێت، بە دڵی هەموو لایەک بێت و لە بەرژەوەندی گشتی بێت، چونکە داواکەی یەکێتی بۆ بەرژەوەندی گشتییە و لەپێناو خزمەتی خەڵکی هەرێمی کوردستانە بەسەرجەم پێکهاتەکانەوە".

PUKMEDIA