وته‌بێژی كۆمسیۆن: دوای راگه‌یاندنی ئه‌نجامه‌كان ده‌رگای تانه‌دان ده‌كرێته‌وه‌

PUKMEDIA

لۆگۆی کۆمسیۆنی باڵای سەربەخۆی هەڵبژاردنەکان

جیاكردنه‌وه‌و هه‌ژماركردنی ده‌ستی ده‌نگی تایبه‌ت و ئه‌و وێستگانه‌ی كه‌ به‌هۆی كێشه‌ی ته‌كنیكی له‌ئامێره‌كانیاندا ئه‌نجامه‌كانیان نه‌نێردرابوون بۆ ئۆفیسی سه‌ره‌كی له‌به‌غدا ته‌واوبوو، وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراقیش ده‌ڵێت:"دوای راگه‌یاندنی ئه‌نجامه‌كان ده‌رگای تانه‌دان ده‌كرێته‌وه‌و پاشان له‌دوای به‌دواداچوون بۆ تانه‌كان و یه‌كلاكردنه‌وه‌یان، ئه‌نجامی تانه‌كانیش راده‌گه‌یه‌نین".

جومانه‌ غه‌لای وته‌بێژی كۆمسیۆنی باڵای سه‌ربه‌خۆی هه‌ڵبژاردنه‌كانی عیراق به‌سایتی ره‌سمیی یه‌كێتیی نیشتمانیی كوردستان PUKMEDIA ی راگه‌یاند:"رۆژی پێنج شه‌ممه‌ی رابردوو كۆمسیۆن ده‌ستیكرد به‌جیاكردنه‌وه‌و بژاردنه‌وه‌ی ده‌ستی ده‌نگه‌كانی ئه‌و وێستگانه‌ی كه‌ به‌هۆی كێشه‌ی ته‌كنیكییه‌وه‌ له‌ئامێره‌كاندا له‌كاتی دیاریكراودا كه‌ ٦ سه‌عاته‌ ئه‌نجامه‌كانیان نه‌نێردرابوون بۆ ئۆفیسی سه‌ره‌كی له‌به‌غدا".

"له‌پرۆسه‌كه‌دا هه‌ژماری ده‌ستی بۆ زیاتر لە 1000 وێستگه‌ كرا، كه‌ 50 وێستگه‌یان تایبه‌ت بوو به‌ ده‌نگدانی گشتی، هه‌روه‌ها له‌ئێستادا كه‌ پرۆسه‌كه‌ ته‌واو بووه‌، هه‌وڵده‌ده‌ین له‌ماوه‌یه‌كی نزیكدا ئه‌نجامی كۆتایی ده‌نگدانی گشتی و تایبه‌تی هه‌ڵبژاردنی ئه‌نجومه‌نی پارێزگاكانی عیراق رابگه‌یه‌نین".

جومانه‌ غه‌لای راشیگه‌یاند:" له‌ئێستادا كه‌پرۆسه‌ی جیاكردنه‌وه‌ی ده‌نگه‌كان به‌كۆتا گه‌یشتووه‌، له‌ماوه‌یه‌كی نزیكدا ئه‌نجامی گشتی هه‌ڵبژاردن راده‌گه‌یه‌نرێت و پاشان ده‌ستده‌كرێت به‌ وه‌رگرتنی تانه‌كان له‌پرۆسه‌كه‌، دوای یه‌كلاكردنه‌وه‌ی تانه‌كانیش ئه‌نجامی تانه‌كان راده‌گه‌یه‌نین".

به‌پێی زانیارییه‌كانی PUKMEDIA، به‌تێكڕا 123 سكاڵا له‌كۆمسیۆن تۆمار كراوه‌و هه‌رچی سكاڵای سه‌وزیشه‌ كه‌ له‌سه‌ر چاودێران و هێزه‌ ئه‌منییه‌كان و فه‌رمانبه‌رانی وێستگه‌كان تۆماركراون كۆمسیۆن رێكاری پێویستیان به‌رامبه‌ر ده‌گرێته‌به‌رو كه‌مته‌رخه‌مه‌كان سزا ده‌درێن، هاوكات هیچ سكاڵایه‌كی سوور سه‌باره‌ت به‌ پرۆسه‌ی هه‌ڵبژاردنه‌كان تۆمارنه‌كراوه‌.

رۆژی 19 -12-2023 كۆمسیۆنی باڵای سه‌ربه‌خۆی هه‌ڵبژاردنه‌كانی عیراق ئه‌نجامی 94.4% ی ده‌نگدانی گشتی راگه‌یاند، له‌دوای جیاكردنه‌وه‌ی ده‌نگی تایبه‌ت و ئه‌و وێستگانه‌ی ئه‌نجامه‌كانیان نه‌نێدرابون، بڕیاره‌ له‌ماوه‌یه‌كی نزیكدا ئه‌نجامی كۆتایی هه‌ڵبژاردن رابگه‌یه‌نێت و پاشان ده‌رگای تانه‌دان بكرێته‌وه‌.



PUKMEDIA