وەزیری دادی عیراق سکاڵا لەسەر کەناڵی کوردستان24 تۆماردەکات

ئەرشیف

د.خالید شوانی وەزیری دادی عیراق

د.خالد شوانی وەزیری دادی عیراق لە بەرامبەر هەواڵێکی ناڕاستی کەناڵی (کوردستان٢٤) و پێگە ئەلیکترۆنیەکانی سەر بەو کەناڵە لە دادگا سکاڵای یاساییان لەسەر تۆماردەکات و رایدەگەیەنێت:" ناکرێت ئەم دەزگایە وا بەئاسانی جورئەتی ئەوە بکەن بەندە تەخوین بکەن بەبێ بەڵگە لەپێناو مەرامی سیاسی، بۆیە دەبێت لەبەرامبەر عەدالەتی دادگا ئامادەبن و چاوەڕوانی ئیجرائاتی یاسایی بن لەبەرامبەریان".

لەراگەیەنراوێکی رۆژنامەنووسی نوسینگەی راگەیاندنی وەزیری دادی عیراق کە وێنەیەکی بۆ PUKMEDIA نێردراوە هاتووە:"لەبەرامبەر هەواڵێکی پڕ لەتۆمەت و بوختانی کەناڵی (کوردستان٢٤) و پێگە ئەلیکترۆنیەکانی سەر بەو کەناڵە کە بڵاوکراوەتەوە لەسەر د.خالد شوانی وەزیری داد و تیایدا کەناڵەکە بەڕێزیانی توومەتبار کردبوو بە پیلانگێڕی بۆ دەستکاریکردنی دەرئەنجامی هەڵبژاردنەکانی کەرکوک و کەمکردنەوەی کورسییەکی پارتی بۆ بەرژەوەندی لایەنێکی عەرەبی، بۆ ئەم مەبەستە ئەمڕۆ د.خالد شوانی لە دادگا سکاڵای یاسایی لە دژی کەناڵی (کوردستان ٢٤) تۆمارکرد".

هەر لەراگەیەنراوەکەدا هاتووە:"وێرای جەخت کردنەوەمان و باوەربوونی تەواومان بە ئازادی ڕۆژنامەگەری و ڕاگەیاندن، بەڵام ناکرێت ئەم دەزگایە وا بەئاسانی جورئەتی ئەوە بکەن بەندە تەخوین بکەن بەبێ بەڵگە لەپێناو مەرامی سیاسی، بۆیە دەبێت لەبەرامبەر عەدالەتی دادگا ئامادەبن و چاوەڕوانی ئیجرائاتی یاسایی بن لەبەرامبەریان".

PUKMEDIA