شێخ جەعفەر ستایشی ئەڵمانیا دەكات لەرووبەڕووبونەوەی توندڕەوی

PUKMEDIA

پێشوازی شێخ جەعفەر شێخ مستەفا لە كونسوڵی گشتیی ئەڵمانیا لە هەرێم

ئەمڕۆ ٢٠٢٣/١٢/٢٠ شێخ جەعفەر شێخ مستەفا، جێگری سەرۆكی هەرێمی كوردستان، پێشوازی لە كلاوس دیتەر شترایشەر، كونسوڵی گشتیی ئەڵمانیا لە هەرێمی كوردستان كرد.‍

لە كۆبوونەوەیەكدا جێگری سەرۆكی هەرێم ستایشی پەیوەندییەكانی نێوان وڵاتی ئەڵمانیا و هەرێمی كوردستانی كرد، بە تایبەت لە رووبەڕووبوونەوەی تیرۆر و بیری توندڕەوی گروپە تیرۆریستییەكان و فەراهەمكردنی سەقامگیریی ئاشتی و ئارامی بۆ ناوچەكە، سەبارەت بە تێپەڕاندنی دۆخی چەقبەستووی نێو پڕۆسەی سیاسیش، گفتوگۆی نێوان لایەنە سیاسییەكانی لە سەر بنەمای دەستوور بە تاكە چارەسەر زانی، هیوای خواست بۆ ساڵی داهاتوو كێشەكانی نێوان بەغدا و هەولێر بچێتە قۆناغێكی نوێی بەڕێوەبردنی دامودەزگاكانی دەوڵەت دوور لە كێشە و ململانێی سیاسیی.‍

لای خۆیەوە كونسوڵی گشتی ئەلمانیا جەختی لە بەردەوامبوون و برەودان بە پەیوەندییەكانی وڵاتەكەی لەگەڵ هەرێمی كوردستان كردەوە، هەروەها یەكڕیزی و یەكگرتوویی نێوان لایەنە سیاسییەكانی بە پێویست زانی بۆ گەیشتن بە چارەسەركردنی بنەڕەتی كێشەكانی نێوان بەغدا و هەولێر.‍

PUKMEDIA