دوو کاندیدی یەکێتی زۆرترین دەنگی پارێزگای کەرکوک بەدەستدەهێنن

PUKMEDIA

کاندیدانی سەرکەوتوی یەکێتی

دوو کاندیدی یەکێتیی نیشتمانیی کوردستان لە هاوپەیمانی کەرکوک هێز و ئیرادەمانە لەکۆی ٢٤٤ کاندید لە پارێزگای کەرکوک زۆرترین دەنگیان بەدەستهێناوەو بە رێژەیەکی زۆر لەپێش یەکەم دەنگی لیست و هاوپەیمانێتییەکانی دیکەوەن.

نەشئەت شاهوێز خورشید کاندیدی یەکێتیی نیشتمانیی کوردستان لە هاوپەیمانی کەرکوک هێز و ئیرادەمانە لە هەڵبژاردنی ئەنجومەنی پارێزگاکانی عیراق لەکۆی ١٧٦ کاندیدی نێر زۆرترین دەنگی لەسەر ئاستی سەرجەم کاندیدانی پارێزگاکە بەدەستهێناوە، کە ٣٧ هەزار و ٩٧١ دەنگە، لەپاش ئەویش راکان جبوری پارێزگاری سەپێنراوی کەرکوک دێت، کە ٣٦ هەزار و ٦١٧ دەنگی هەیە، کە کاندیدەکەی یەکێتی زیاتر لە هەزار دەنگ لەپێشیەوەیەتی.

لەسەر ئاستی ژنانیش لە پارێزگای کەرکوک کە ٦٨ کاندیدی مێ بەشداربوون، پەروین فاتیح حەمید کاندیدی یەکێتیی نیشتمانیی کوردستان لە هاوپەیمانی کەرکوک هێز و ئیرادەمانە بەراورد بە یەکەم دەنگی ژنانی سەرجەم لیست و هاوپەیمانێتییەکانی دیکە، بەڕێژەیەکی زۆر لەپێش یەکەمی کاندیدە ژنەکانەوەیە، کە ٥ هەزار و ٣٩٦ دەنگی بەدەست هێناوە، لەدوای ئەویش سەوسەن عەبدولواحید لە جەبهەی تورکمانی دێت کە ٤ هەزار و ٨٣١ دەنگی بەدەستهێناوە، کە جیاوازییەکەیان زیاتر لە ٥٠٠ دەنگە.

ئەنجومەنی پارێزگای کەرکوک لە ١٦ کورسی پێکدێت، کە ١ کورسییان بۆ کۆتای پێکهاتەی مەسیحییەکانە و ١٥ کورسییەکەی دیکەش لە کێبڕکێی هەڵبژاردندا بەسەر لایەنەکاندا دابەش دەبێت.

لەگەڵ ئەوەی هەتا ئێستا ئەنجامی دەنگدانی تایبەت رانەگەیەندراوە، بەڵام ھاوپه‌یمانی كه‌ركوك ھێز و ئیراده‌مانه‌ تائێستا ٥ كورسی مسۆگه‌ر كردوه‌، هاوكات ھاوپه‌یمانی عه‌ره‌بی ٢ كورسی به‌ده‌ستھێناوه‌و به‌ره‌ی توركمانی عیراقی یه‌كگرتوو ٢ كورسی به‌ده‌ستھێناوه‌، هه‌روه‌ها پارتی دیموكراتی كوردستانیش تائێستا ١ كورسی بۆ یه‌كلابوه‌ته‌وه‌وھاوپه‌یمانی عروبه‌ش ١ كورسی به‌ده‌ستھێناوه‌ و ھاوپه‌یمانی قیاده‌ ١ كورسی به‌ده‌ستھێناوه‌.

PUKMEDIA

ژمارەی دەنگ و ناوی کاندیدانی ئەنجومەنی پارێزگای کەرکوک