هاوپه‌یمانی كه‌ركوك هێزو ئیراده‌مانه‌ لە کۆمسیۆن سكاڵا تۆمار ده‌كات

PUKMEDIA

هاوپەیمانی کەرکوک هێز و ئیرادەمانە

هاوپه‌یمانی كه‌ركوك هێزو ئیراده‌مانه‌ 15 سكاڵا له‌سه‌ر پرۆسه‌ی هه‌ڵبژاردنی ئه‌نجومه‌نی پارێزگای كه‌ركوك تۆماركردوه‌و جۆری سه‌رپێچی و رێگرییه‌كانیشی دیاریی كردوه‌ كه‌ به‌رامبه‌ر به‌ده‌نگده‌رانی كورد له‌شاره‌كه‌ ئه‌نجامدراوه‌.

سه‌رچاوه‌یه‌كی ره‌سمی له‌ مه‌كته‌بی هه‌ڵبژاردنی یه‌كێتی به‌سایتی ره‌سمی یه‌كێتیی نیشتمانیی كوردستان PUKMEDIA ی راگه‌یاند:" له‌ رۆژی ده‌نگدانی تایبه‌ت و گشتی دا كه‌ رۆژانی 16 و 18ی ئه‌م مانگه‌ به‌ڕێوه‌چوون، رێگری و خروقاتی زۆر هه‌بووه‌، بۆیه‌ هاوپه‌یمانی كه‌ركوك هێزو ئیراده‌مانه‌ به‌ره‌سمی 15 سكاڵای له‌كۆمسیۆن تۆمار كردوه‌ له‌سه‌ر ئه‌و ژماره‌ زۆره‌ی كه‌ ده‌نگده‌ری كورد نه‌یتوانی ده‌نگ بدات ، هه‌روه‌ها كێشه‌ی په‌نجه‌مۆر و نه‌خوێندنه‌وه‌ی كارتی ده‌نگدان كه‌(ته‌خه‌تی) تێپه‌ڕاندن بۆ ده‌نگده‌ری كورد نه‌كراوه‌ له‌ناوچه‌ عه‌ره‌بییه‌كان، به‌ڵام بۆ پێكهاته‌كانی دیكه‌ كراوه‌".

"جۆرێكی دیكه‌ی سكاڵاكان بریتی بوون له‌و سه‌رپێچییانه‌ی كه‌ له‌ناوچه‌ی حه‌ویجه‌ به‌رامبه‌ر به‌ده‌نگده‌رانی كورد كراون و ئاسته‌نگ بۆ ده‌نگدانیان دروستكراوه‌و به‌ڵگه‌ ره‌سمییه‌كانیش هاوپێچی سكاڵاكانن"، سه‌رچاوه‌كه‌ وایوت.

هەر لەو بارەیەوە ئاسۆ مامەند سەرۆکی قەوارەی هاوپەیمانی کەرکوک هێز و ئیرادەمانە بە سایتی رەسمی یەکێتیی نیشتمانیی کوردستان PUKMEDIA ی راگەیاند: "لە هەڵبژاردنی گشتیدا خروقاتی زۆر بەرامبەر بە دەنگی کورد کراوەو دەیان هەزار کورد بەهۆی نەخوێندنەوەی پەنجەمۆریان لە دەنگدان بێبەش کراوە، لەم چوارچێوەیەشدا سکاڵامان تۆمار کردووە و بەڵگەکانمان خستۆتەروو، ئەمە جگە لەوەی بەرامبەر دەنگی کورد پێشێلکاری زۆر هەبووە".

ئەمەش لە کاتێکدایە کۆمسیۆنی باڵای سەربەخۆی هەڵبژاردنەکانی عیراق رایگەیاندووە: "پاش راگەیاندنی ئەنجامە بەراییەکان ئامادەین بۆ وەرگرتنی سکاڵاکان و بەدواداچوونیان بۆ دەکەین بەپێی ئەو بەڵگانەی کە لەگەڵیاندا پێشکەش کراون و پاشان بڕیاریان لەسەر دەدەین، سکاڵاکانیش تایبەتن بە رۆژی دەنگدان و ئەو پێشێلکارییانەی کەلەو رۆژەدا روویان داوە".

PUKMEDIA