دەنگدانی گشتی ئەنجومەنی پارێزگاکانی عیراق کۆتاییهات

PUKMEDIA

ئامێری دەنگدان

پرۆسەی دەنگدانی گشتی بۆ هەڵبژاردنی ئەنجومەنی پارێزگاکانی عیراق بەبێ درێژکردنەوەی وادەکەی سەعات 6:00 ی ئێوارەی ئەمڕۆ 18-12-2023 کۆتایی هات، کە لە 15 پارێزگای عیراق بەڕێوەچوو، تێیدا زیاتر لە 15 ملیۆن دەنگدەری گشتی مافی دەنگدانیان هەبوو.

دەنگدەران گرفتیان بۆ دروستبوو

بەگوێرەی وتەی چاودێرانی یەکێتیی نیشتمانیی کوردستان لە وێستگە و بنکەکانی دەنگدان کە بە PUKMEDIA یان راگەیاند: "گرفتی نەخوێندنەوەی پەنجەمۆری دەنگدەر هەبووە، بەشێوازێک ژمارەی پشت کارتی دەنگدانی هاووڵاتیان بۆ دەنگدان و نەفەوتانی دەنگەکانیان بەکارهێنرا و داواش لە هاووڵاتیان کرا دووبارە بەرەو سندوقەکانی دەنگدان بچن".

بەپێی ئامارەكانی كۆمسیۆنی هەڵبژاردنەكانی عیراق، 15 ملیۆن و 108 هەزار و 135 دەنگدەری گشتی توانای بەشداری کردنیان لە هەڵبژاردنی ئەنجومەنی پارێزگاكانی عیراق هەبوو، هەروەها بەپێی داتاو زانیارییەكانی كۆمسیۆنی هەڵبژاردنەكانی عیراق و دەزگای هەڵبژاردنی یەكێتیی نیشتمانیی كوردستان كە دەست PUKMEDIA كەوتووە، ژمارەی دەنگدەرانی ناوچە جێناكۆكەكان بریتی بوو لە 4 ملیۆن و 378 هەزار و 282 دەنگدەر كە دەكاتە نزیكەی یەك لەسەر سێی دەنگدەرانی گشتی هەڵبژاردنی ئەنجومەنی پارێزگاكانی عیراق.

دەنگدانی گشتی عیراق

 پرۆسەی دەنگدانی گشتی لەسەعات 7:00ی بەیانی ئەمڕۆوە دەستیپێکرد و نزيكەی 8 هەزار ناوەند و 39 هەزار وێستگەی دەنگدان بۆ دەنگدەران ئامادەكران، بەمەش 16 ملیۆن و 158 هەزار و 788 دەنگدەر بە گشتی و تایبەت و راگوێزراوەوە بەشداری هەڵبژاردنەكانی ئەنجومەنی پارێزگاكانی عیراق دەكەن و 7 هەزار و 766 ناوەند و 38 هەزار و 40 وێستگەی دەنگدان بۆ دەنگدەران ئامادەكرابوون.

بۆ هەڵبژاردنی ئەنجومەنی پارێزگاكانی عیراق 134 لیست بەشداری هەڵبژاردنی ئەنجومەنی پارێزگاکانیان کرد، کە 39 هاوپەیمانی و 29 حزب و 66 کاندیدی سەربەخۆ بوون، کە نزیکەی 40 رۆژ بانگەشە بۆ لیست و کاندیدەکانیان بەردەوامبوو، هاوکات رۆژی دووشەممەش 18-12-2023 پرۆسەی دەنگدانی گشتی بەڕێوەدەچێت.

دەنگدان لە ناوچە جێناکۆکەکان

ژمارەی دەنگدەران لە ناوچە جێناکۆکەکان بەجۆرێکە کە نەینەوا زۆرترین رێژەی دەنگدەری هەیە و سەڵاحەدین کەمترین رێژەی دەنگدەری هەیە.

پارێزگای نەینەوا خاوەنی 1 ملیۆن و 795 هەزار و 292 دەنگدەرە، بەجۆرێک کە 1 ملیۆن و 695 هەزار و 566 دەنگدەری گشتین و 99 هەزار و 792 کەسیش دەنگدەری تایبەتن.

پارێزگای دیالەش خاوەنی 950 هەزار و 114 دەنگدەرە، بەجۆرێک 892 هەزار و 710 کەسیان دەنگدەری گشتین و 57 هەزار و 404 کەسیش دەنگدەری تایبەتن.

سەبارەت بە پارێزگای کەرکوک، 870 هەزار و 920 دەنگدەری هەیە کە 813 هەزار و 590 کەسیان دەنگدەری گشتین و 57 هەزار و 330 کەسیش دەنگدەری تایبەتن.

پارێزگای سەلاحەدینیش خاوەنی 770 هەزار و 956 دەنگدەرە، بەجۆرێک 703 هەزار و 563 کەس دەنگدەری گشتین و 67 هەزار و 393 کەس دەنگدەری تایبەتن.

PUKMEDIA