رێبوار تەها: نەیارانمان دژی کوردستانی بونی کەرکوک پیلان دەگێڕن

PUKMEDIA

رێبوار تەها و خالید شوانی

پیلانێکی گەورە لە کەرکوک دژی کوردەکان ئەنجامدراوە و بە هەزاران کورد بێبەش کراون لە دەنگدان، بۆ پووچەڵکردنەوە ئەو پیلانەش داوا لە کوردەکانی کەرکوک دەکرێت بچن دەنگ بدەن و رێگا نەدەن نەیارەکانمان ئاهەنگی سەرکەوتن بگێڕن.

لەو چوارچێوەیەشدا کەمێک پێش ئێستا کۆنگرەیەکی رۆژنامەوانی بۆ خالید شوانی و رێبوار تەها سازکرا و لەسەرەتای کۆنگرەکەدا خالید شوانی رایگەیاند: "داوا لە کەرکوکییە ئازیزەکان دەکەم ئەم چەند سەعاتەی کە ماوە بچن دەنگ بدەن و چوار ساڵی باشتر بۆ نەوەکانیان دەستەبەر بکەن".

"هەموو کوردستان چاوەڕوانی کەرکوکییەکانن کە بە دەنگەکانیان جارێکی دیکە کوردستانیبوونی شارەکە بسەلمێننەوە و لەم تاقیکردنەوە پڕ پیلانگێڕییەدا سەرکەون، بۆیە داواتان لێدەکەم ئەوکەسانەی تائێستا نەچوونەتە سەر سندوقەکانی دەنگدان و دەنگیان نەداوە، بچن دەنگی خۆیان بەو لایەنە بدەن کە لە هەموو نەهامەتییەکاندا لەگەڵیان بووە هەرگیز بەجێی نەهێشتوون"، خالید شوانی وای وت

هەر لە کۆنگرە رۆژنامەوانییەکەدا رێبوار تەها ئەندامی سەرکردایەتی یەکێتیی نیشتمانیی کوردستان رووی کردە کەرکوکییەکان و رایگەیاند: "نەیارەکانمان زۆر بەهێزەوە بەرەو سندوقەکانی دەنگدان دەچن و دەیانەوێت کوردستانیبوونی کەرکوک بسڕنەوە، بۆیە داوام وایە رێگا نەدەن نەیارەکانمان ئاهەنگی سەرکەوتن بگێڕن".

وتیشی: "بەرنامەیەکی پیلان بۆداڕێژراو لە دژی دەنگی کورد جێبەجێ کراوە و بە دەیان هەزار کورد پەنجەمۆر و کارتی دەنگدانیان ناخوێندرێتەوە و رێگایان پێنادرێت دەنگ بدەن، بۆیە تکام وایە کەرکوکییە قارەمانەکان وەک چۆن هەمیشە پێشەنگی قوربانیدان و بەزاندنی دوژمن بوون، ئەمڕۆش پیلانی نەیارانمان بە دەنگەکانیان پووچەڵ بکەنەوە و رێگا نەدەن ئەمشەو ئاهەنگی سەرکەوتن بگێڕن".

PUKMEDIA