ئاسایشی هەرێم دەستبەسەر 398 كگم ماددەی هۆشبەردا دەگرێت

PUKMEDIA

كۆنگرەی رۆژنامەزانی دەزگای ئاسایشی هەرێم

دەزگای ئاسایشی هەرێم لەماوەی ساڵێكدا دەستیبەسەر 398 كگم ماددەی هۆشبەردا گرتووە و 331 تۆمەتباریش بەتۆمەتی تیرۆر دەستگیر كردووە، هاوكات روبەڕووی زیاتر لە 3 هەزار تاوانی ئەلكترۆنی بووەتەوە.


عەمید پشتیوان بەهادین بەڕێوەبەری بەڕێوەبەرایەتی لێكۆڵینەوەی دەزگای ئاسایشی هەرێم لە كۆنگرەیەكی رۆژنامەزانیدا ئاماری كاروچالاكییەكانی ساڵی 2023 ی بڵاوكردەوە و رایگەیاند: "لەماوەی ئەم 12 مانگەدا توانراوە 187 ئۆپراسیۆن دژی تیرۆرستان و 15 گەڕان و پشكنین بۆ تیرۆرستان ئەنجامبدرێت، ئەمە لە كاتێكدایە 331 تۆمەتبارمان دەستگیر كردووە، لەگەڵ ئەوەشدا توانیومانە لە 66 حاڵەتدا هاوكاری هێزە ئەمنییەكانی دیكە بكەین".

راشیگەیاند: "هێزەكانمان روبەڕووی 3 هەزار و 38 تاوانی ئەلكترۆنی بوونەتەوە و دەستیان بەسەر كەرەستەكانیاندا گرتووە، ئەمە جگە لەوەی روبەڕووی 991 حاڵەتی ماددەی هۆشبەر بووینەتەوە، كە لەو ژمارەیە 84 كەسیان بازرگان بوون و 653 كەسیشیان بەكارهێنەر و 254 كەسیشیان فرۆشیار بوون، كە لە ئۆپراسیۆنەكانماندا دەستمان  بەسەر 398 كیلۆگرام ماددەی هۆشبەردا گرتووە".

عەمید پشتیوان بەهادین وتیشی: "دەزگای ئاسایشی هەرێم، لەماوەی یەك ساڵی رابردوودا توانیویەتی 5 هەزار و 36 كەس دەستگیر بكات، بەشێكی بۆ هاوكاریكردنی هێزە ئەمنییەكانی دیكە بووە، لەگەڵ ئەوەشدا توانیومانە لەڕێگەی هێزەكانمانەوە رێگری لە 233 كۆچی نایاسایی بگرین و روبەڕووی یاسایان بكەینەوە، هەروەها بە هاوبەشی لەگەڵ لیژنەكانی قائیمقامییەتدا توانیومانە زیاتر لە 30 هەزار سەردان بۆ دوكان و شوێنە گشتییەكان بكەین و سەرپێچی كاران روبەڕووی یاسا بكەینەوە".

لینكی ئاماری کاروچالاکییەکانی  ساڵی ٢٠٢٣  دەزگای ئاسایشی هەرێم

PUKMEDIA