سەعدی ئەحمەد پیرە: كەسوكاری شەهیدان خاوەنی راستەقینەی یەكێتین

PUKMEDIA

سەعدی ئەحمەد پیرە وتەبێژی یەكێتیی نیشتمانیی كوردستان

رۆژی 13-12-2023، سەعدی ئەحمەد پیرە وتەبێژی یەكێتیی نیشتمانیی كوردستان بەیاوەری بڵێسە جەبار فەرمان ئەندامی سەركردایەتی و لێپرسراوی مەكتەبی شەهیدان و تێكۆشەرانی یەكێتی لە هەولێر لەگەڵ ژمارەیەكی بەرچاو لە خانەوادە و كەس و كاری شەهیدانی یەكێتیی نیشتمانیی كوردستان كۆبوونەوە .


لە سەرەتای كۆبوونەوەكدا بڵێسە جەبار فەرمان ئەندامی سەركردایەتی و لێپرسراوی مەكتەبی شەهیدان و تێكۆشەرانی یەكێتیی نیشتمانیی كوردستان وتەیەكی پیشكەش كرد و ئاماژەی بەوە كرد: "لەدوای پێنجەمین كۆنگرەوە بەرنامەڕێژی بۆ زیاتر خزمەتكردنی كەس و كاری شەهیدان كراوە، بەبەرنامەیەكی تۆكمە و سەردەمیانە كار بۆ هێنانەدی هەموو خواست و داواكارییەكانی كەسوكاری شەهیدان بكەن".

وتیشی: "رۆڵە وخانەوادە و كەس و كاری شەهیدان ئەمانەتێكی گەورەن لای یەكێتی و بەئەركی خۆمانی دەزانێت هەرچی پێویست بێت بۆ كەسوكار و رۆڵەی شەهیدان ئەنجامی بدەین".

پاشان سەعدی ئەحمەد پیرە وتەبێژی یەكێتیی نیشتمانیی كوردستان خۆشحاڵی خۆی دەربڕی بەوەی كە جارێكی دیكە لەگەڵ كەسوكار و خانەوادەی شەهیدان كۆدەبێتەوە و ئاماژەی بەوەشكرد: "كە لە بنەماڵەكەیاندا بە درێژایی مێژووی شۆڕشەكانی كوردستان دەیان شەهیدیان بەخشیوە خۆی بە بەشێك لەكەسوكاری شەهیدان دەزانێت"، وتیشی: "خاوەنی راستەقینەی یەكێتیی نیشتمانیی كوردستان بنەماڵە و كەسوكاری ئەو شەهیدانەن كە بۆ پارێزگاری كوردستان و یەكێتی خوێنیان بەخشی".

تەئكیدیشی كردەوە: "سەرۆك بافڵ جەلال تاڵەبانی لە هەموو كۆبوونەوە و سەردان و گفتوگۆكانیدا چ لە ناوخۆی یەكێتی چ لەگەڵ بە غداش یەكێك لە تەوەرە هەرە گرنگەكانی مەسەلەی خزمەتكردنی كەسوكاری شەهیدان و زیاتر گرنگی پێدان بووە بە دابینكردنی ئایندەیەكی پڕ لە خۆشگوزەرانی بۆیان، بەڵام ئەمە لە كاتێكدا دەكرێت كە یەكێتیی نیشتمانیی كوردستان زیاتر و بەهێزتر دەربكەوێت بۆیە ئێمە لەبەردەم دوو هەڵبژاردن داین هەڵبژاردنی ئەنجومەنی پارێزگاكانی عیراق كە لە چەند رۆژی داهاتوودا ئەنجام دەدرێت و هەڵبژاردنی پەرلەمانی كوردستان كە چەند مانگێكی ماوە.

سەعدی ئەحمەد پیرە ئاماژەی بەوەشكرد: "سەركەوتنی یەكێتیی نیشتمانیی كوردستان لەم هەڵبژاردنە بەتایبەتی لە كەركوك واتە سەركەوتنی كورد، تەئكدیشی كردەوە كە كاندیدەكانی یەكێتی خۆیان بە داكۆكیكار و نوێنەری هەموو پێكهاتەكان دەزانن لەو شوێنانەی كە خۆیان تێدا كاندید كردووە".

لە كۆتاییدا سەعدی ئەحمەد پیرە روویكردە بنەماڵەی شەهیدان و ئاماژەی بەوەكرد: "یەكێتیی نیشتمانیی كوردستان زۆر دڵنیایە كە بنەماڵە و كەسوكاری سەربەرزی شەهیدان جگە لە خۆیان هاندەریش دەبن بۆ خەڵكانی تر تاوەكو لەم هەڵبژاردنەدا بەشێوەیەكی بەرفراوان بەشداری بكەن لە پێناو سەرخستنی كاندیدەكانی یەكێتیی نیشتمانیی كوردستان".

PUKMEDIAٍٍ