ئەندامێکی سەرکردایەتی یەکێتی: هەڵبژاردن لەکەرکوک پرسێکی نیشتمانی و دیموکراسییە

PUKMEDIA

ستران عەبدوڵڵا

ئەندامێکی سەرکردایەتی یەکێتی رایدەگەیەنێت: "بۆداهاتووی کەرکوک و پرسی هەڵبژاردن لەم شارە خۆمان سەرقاڵی چەلەحانێی حزبی ناکەین و هەڵبژاردنی کەرکوک وەک پرسێکی نیشتمانی و دیموکراسی لێی دەڕوانین، هەروەها سوپاسی هەموو ئەو کەسانە لایەنانە دەکەین، کەدێنە ناو ریزەکانی یەکێتیی نیشتمانیی کوردستان و هاوپەیمانێتییەکەمان، ئەمەش لە چوارچێوەی هەستکردنیانە بە بەرپرسیارێتی".

ستران عەبدوڵڵا ئەندامی سەرکردایەتی یەکێتیی نیشتمانیی کوردستان لە کۆنگرەیەکی رۆژنامەوانیدا رایگەیاند: "سوپاسی هەموو ئەو کەس و لایەنانە دەکەین کەدێنە ناو ریزەکانی یەکێتیی نیشتمانیی کوردستان و هاوپەیمانێتی کەرکوک هێز و ئیرادەمانە، بۆ ئەم پرسە نەتەوەییە خۆمان سەرقاڵی چەلەحانێی حزبی ناکەین و پێمان وایە سەنگەری کوردایەتی و هاوپەیمانی لە کەرکوک سەنگەرێکی پتەوەو، ئێمەی کەرکوکی وەک ململانێیەکی حزبی لە هەڵبژاردنی داهاتووی کەرکوک ناڕوانین بەڵکوو بە پێچەوانەوە وەک ململانێیەکی دیموکراسی و نیشتمانی سەیری دەکەین".

"یەکێتیی نیشتمانیی کوردستان دەیەوێت بۆ داهاتووی کەرکوک پارێزگارێکی کورد شارەکە بەڕێوەبەرێت و بەیەک چاو سەیری سەرجەم پێکهاتەکان بکات، هەروەها خزمەتگوزاری بێجیاوازی بگەیەنێتە هەموو کوچەو کۆڵان و گوند و قەزا و ناحیەی شارەکە"، ستران عەبدوڵڵا وای وت.

PUKMEDIA