شاڵاو کۆسرەت رەسوڵ: بە یەکڕیزی ناوماڵی کورد کێشەکان چارەسەر دەبن

PUKMEDIA

شاڵاو کۆسرەت رەسوڵ

لەمیانی بەڕێوەچوونی بانگەشەی هەڵبژاردن بۆ لیست و هاوپەیمانێتی و کاندیدانی یەکێتیی نیشتیمانی کوردستان لە پارێزگا جێناکۆکەکان شاڵاو کۆسرەت رەسوڵ لە وتەیەکیدا رایگەیاند: "کێشەکانی نێوان حکومەتی ھەرێم و بەغدا لەبارەی موچە و بودجە تەنیا بەگفتوگۆ و یەکریزی ماڵی کورد چارەسەردەکرێت".

شاڵاو کۆسرەت رەسوڵ ئەندامی مەکتەبی سیاسی یەکێتیی نیشتمانیی کوردستان لەبارەی هەڵبژاردنەوە رایگەیاند: "هەڵبژاردنی ئەنجومەنی پارێزگای کەرکوک گرنگە بۆ کەرکوک و کەرکوکییەکان، چونکە ھەژدە ساڵە ئەنجومەنی پارێزگای کەرکوک ھەڵبژاردنی نەکردوە، بۆیە بۆ خزمەتکردنی خەڵکەکەمان لەم شارە گرنگە ئەم ھەڵبژاردن، ئێمە وەک یەکێتیی نیشتمانیی کوردستان بەردەواین لەبانگەشەی ھەڵبژاردن و بەھەموو شێوەیەک تێدەکۆشین بۆ ئەوەی ھەڵبژاردنی ئەنجومەنی پارێزگای کەرکوک بکرێت".

"پاش ئەم هەڵبژاردنەش بۆ ھەڵبژاردنی پەرلەمانی کوردستان ئامادەین و کاردەکەین بۆ سەرخستنی یەکێتی لەھەڵبژاردنەکەدا، وەک چۆن لەدوای پێنجەمین کۆنگرەی یەکێتی بەرنامەمان ھەبوو لەگەڵ ھەموو لایەنە سیاسیەکان لەکوردستان و لەعیراقیش کۆببینەوە و دەمانەوێ کاری ھاوبەش بکەین بۆ خزمەتکردنی خەڵک ، لەگەڵ پارتیش لەئاستی بەرز کۆبونەوە کراوە ھیوادارین ئەو کێشانەی ھەبوو لەرابردوو چارەسەربکرێت بەلێکتێگەیشتن"، شاڵاو کۆسرەت رەسوڵ وای وت.

ئەوەش دەڵێت: "کێشەکانی حکومەت و لایەنەکان تەنیا وەزارەتی پێشمەرگە نەبووە، بەڵکوو زۆر کێشە تر ھەیە، وەک خزمەتکردن و خزمەتگوزاری و بەرێوەبردن و بابەتی دارایی و یەکریزی نێو ماڵی کورد ماڵی کورد، ھیوادارین ئەوەی وەزارەتی پێشمەرگە دەستپێکێک بێت بۆ چارەسەرکردنی کۆی کێشەکان، هاوکات کێشەکانی نێوان حکومەتی ھەرێم و بەغداش لەبارەی موچە و بودجە تەنیا بەگفتوگۆ و یەکریزی ماڵی کورد چارەسەردەکرێت".

PUKMEDIA