سەرۆككۆمار: هاوكاری نێوان عیراق و ئەرمینیا زیاتربكرێت

نووسینگەی سەرۆكایەتی كۆمار

سەرۆككۆماری عیراق و سەرۆكی ئەنجومەنی نیشتمانی ئەرمینیا

د. لەتیف جەمال رەشید سەرۆككۆماری عیراق سەردانی بارەگای ئەنجومەنی نیشتمانی ئەرمینیای كرد و لەگەڵ ئالان سیمۆنیان سەرۆكی ئەنجومەنەكە كۆبووەوە.

لە میانی دیدارەكەدا، كە رۆژی 23-11-2023 بەڕێوەچوو، باس لە پێشهاتەكانی دۆخی سیاسی لەسەر گۆڕەپانی نێودەوڵەتی كرا و  سەرۆككۆمار ئاماژەی بە پێویستی فراوانكردنی چوارچێوەی هاریكاری یاسایی نێوان پەرلەمانی عیراق و ئەرمینیا كرد لەڕێی كاراكردنی میكانیزمی پەیوەندی نێوان هەردوولا.

هەروەها سەرۆككۆمار باسی لە دیدارەكانی لەگەڵ هەریەك لە سەرۆك كۆمارو سەرۆك وەزیرانی ئەرمینیا و ئەو رێككەوتن و پلان و  كارانەی داهاتوو كرد، كە هاتوونەتە ئاراوە و خزمەت بە خواستەكانی هەردوو وڵاتی دۆست بۆ گەشەپێدان و خۆشگوزەرانی دەكەن، ئاماژەی بە دۆخی ئەمنی و سیاسی و سەقامگیریی ئابوری عیراقیش كرد، كە ئەوەش هاندەری هاتنە ناوەوەی كۆمپانیا ئەرمەنییەكانە بۆ كەرتی وەبەرهێنان و ئاوەدانكردنەوە.

سەرۆككۆمار جەختی لە گرنگی ئاڵوگۆڕی ئەزمونەكان لە نێوان هەردوولا و گرتنەبەری رێگاكانی پەرەپێدانی كاری پەرلەمانی و یاسادانان كردەوە، پێویستی پاڵپشتیكردنی كارەكانی لیژنەی دۆستایەتی عیراق-ئەرمەنی رونكردەوە.

هەروەها ئاماژەی بەوەدا، كە عیراق وڵاتێكی خاوەن مێژووە و خاوەنی شارستانییەتێكی دێرینە، كە بنەمای یاسادانان و یاسایە لە جیهاندا.

لە بەرامبەردا سیمۆنیان خۆشحاڵی خۆی بە دیدار لەگەڵ سەرۆككۆمار دەربڕی و جەختی لەسەر خواستی وڵاتەكەی كردەوە بۆ فراوانكردنی ئاسۆی هاوكاری لەگەڵ عیراق بۆئەوەی چەندین بوار بگرێتەوە و خزمەت بە بەرژەوەندییەكانی هەردوو وڵاتی دۆست بكات.

لە كۆبوونەوەكەدا محەمەد سدیق ئەندامی ئەنجومەنی نوێنەران و محەمەد حسێن بەحر ئەلعلوم بریكاری وەزیری دەرەوە و ژمارەیەك بەرپرسی دیكە ئامادەبوون.

PUKMEDIA