داوادەكرێت لە دانیشتنێكی نائاساییدا سەرۆكی پەرلەمان هەڵببژێردرێت

PUKMEDIA

ئەنجومەنی نوێنەران

ئەندامێكی ئەنجومەنی نوێنەران رایدەگەیەنێت: "مانەوەی ئەنجومەنی نوێنەران بەبێ سەرۆك لەڕوی یاسایی و سیاسییەوە گونجاو نییە بۆیە داوادەكرێت دەرگای خۆپاڵاوتنی كاندیدەكان بۆ ئەو پۆستە بكرێتەوە و لە دانیشتنێكی نائاساییدا هەڵبژاردنەكە ئەنجامبدرێت".
 
كاروان یاروەیس ئەندامی ئەنجومەنی نوێنەرانی عیراق لە فراكیسیۆنی یەكێتی لە لێدوانێكیدا بۆ سایتی رەسمی یەكێتیی نیشتمانیی كوردستان PUKMEDIA رایگەیاند: "هەوڵەكان چڕكراونەتەوە بۆ ئەوەی هەفتەی داهاتوو هەڵبژاردنی سەرۆكی ئەنجومەنی نوێنەرانی بەڕێوەبچێت، چونكە دواخستنی و مانەوەی ئەنجومەنەكە بەبێ سەرۆك لەڕوی یاسایی و سیاسییەوە گونجاو نییە".

"هاوكات چەند لایەنێك بەبەهانەی نەورژاندنی كێشەكە لەسەروبەندی هەڵبژاردندا، داوا دەكەن هەڵبژاردنی سەرۆكی ئەنجومەنەكە بخرێتە دوای پشووی وەرزی یاسادانان و هەڵبژاردنی ئەنجومەنی پارێزگاكان بۆ ئەوەی  كات بە لایەنە سوننەكانیش بدرێت بۆ رێككەوتن لەسەر كاندیدێكی هاوبەش" كاروان یاروەیس وادەڵێت.

راشیدەگەیەنێت: "هەوڵەكان جددین بۆ ئەوەی شەممەی داهاتوو 25-11-2023، دەرگای خۆپاڵاوتن و تۆماركردنی كاندیدەكان بۆ سەرۆكی ئەنجومەنی نوێنەران بكرێتەوە و ناوەڕاستی هەفتەش لە دانشتنێكی نائاساییدا هەڵبژاردنەكە ئەنجامبدرێت".

ئەمەش لە كاتێكدایە رۆژی 22-11-2023، بەئامادەبوونی 180 ئەندام، دانیشتنی ئەنجومەنی نوێنەرانی عیراق بۆ تاوتوێكردنی ھەڵبژاردنی سەرۆكێكی نوێ بۆ ئەنجومەنەكە و چەند پرسێكی دیكە بەسەرۆكایەتی موحسین مەندەلاوی بەڕێوەچوو، بەڵام هەڵبژاردنی سەرۆكی نوێ بۆ دوای سەری ساڵی نوێ دواخرا.

PUKMEDIA