قوباد تاڵەبانی بۆ وەفدێكی بەریتانیا: هەنگاوەكان بەئاڕاستەی چارەسەری كێشەكانی وەزارەتی پێشمەرگەن

PUKMEDIA

كۆبوونەوەی قوباد تاڵەبانی لەگەڵ وەفدێکی باڵای سەربازی بەریتانیا

قوباد تاڵەبانی جێگری سەرۆكوەزیران پێشوازی لە وەفدێكی باڵای سەربازی بەریتانیا بە سەرۆكایەتی مارشاڵ سامی سامپسۆن، گەورە راوێژكاری بەرگریی بەریتانیا لە رۆژهەڵاتی ناوەڕاست و باكوری ئەفریقا كرد و لە كۆبوونەوەی نێوانیاندا چەندین پرسی جێگەی بایەخی هەردوولا تاوتوێ كران.

لە تەوەرێكی كۆبوونەوەكەدا كە رۆژی چوار شەمە، ٢٢ی نۆڤەمبەری ٢٠٢٣ لە هەولێر بەڕێوەچوو و كونسوڵی گشتی بەریتانیاش بە وەكالەت ئامادەی بوو، باسی دۆخی ناوخۆی هەرێم و پڕۆسەی ریفۆرم لە وەزارەتی پێشمەرگە كرا، جێگری سەرۆكوەزیران رایگەیاند: "لێكتێگەیشتنی باش دروست بووە بۆ چارەسەركردنی كێشەكان و كۆبوونەوەكانی ئەم دواییەی نێوان هەردوو لایەنی یەكێتیی نیشتمانیی كوردستان و پارتی دیموكراتی كوردستان ئەرێنی بوون". 

ئاماژەی بەوەشدا: "هەنگاوەكان بە ئاڕاستەی چارەسەركردنی كێشەكانی ناو وەزارەتی پێشمەرگەن و گەشبینین بەم نزیكانە بە تەواوی كێشەكانی وەزارت بە هاوكاری و پشتیوانی هەموو لایەك چارەسەر بكرێن و ئەمەش رەوتی چاكسازییەكان لە هێزەكانی پێشمەرگە خێراتر دەكات". 

لەمبارەیەوە وەفدی باڵای سەربازی بەریتانیا پشتگیری خۆیان بۆ هەرێمی كوردستان و بە تایبەتیش بۆ بەردەوامی چاكسازییەكانی وەزارەتی پێشمەرگە دووپات كردەوە.

لە بەشێكی دیكەی كۆبوونەوەكەدا باسی دۆخی ئەمنی ناوچەكە و عیراق و هەرێمی كوردستان كرا، هەردوولا جەختیان كردەوە كە پێویستە حكومەت و لایەنە عیراقییەكان هەوڵەكانیان چڕبكەنەوە بۆ رێگریكردن لە هەرچەشنە هەنگاو و جوڵەیەك كە ببێتە هۆی بارگرژی و ناسەقامگیری لە عیراقدا، هەردوولاش هاوڕابوون كە مانەوەی هێزەكانی هاوپەیمانان لە عیراق و هەرێمی كوردستان گرنگە بۆ پاراستنی ئاسایش و سەقامگیری عیراق".

PUKMEDIA