لەتیف نێروەیی: هەموو رۆژێكی ساڵ بۆ یەكێتییەكان رۆژی شەهیدانە

PUKMEDIA

لەتیف نێروەیی

ئەندامێکی سەرکردایەتی یەکێتیی نیشتمانیی کوردستان سەبارەت بە ڕۆژی شەهیدانی یەکێتی رایدەگەیەنێت:" هیچ گوندێك، شاخێك، لوتكەیەك، ئەشكەوتێك، پێدەشتی گەرمیان و كوێستانێكی ئەم وڵاتە نییە قارەمانە نەمرەكانی یەكێتی پەیامی شەهیدستانیان پێنەگەیاندبێت".

لەتیف نێروەیی ئەندامی سەرکردایەتی یەکێتیی نیشتمانیی کوردستان لە وتارێکیدا کە لە بەشی بیروڕای PUKMEDIA بڵاوکراوەتەوە نوسیویەتی: "هۆكاری سەرەكی بۆ دیاریكردنی رۆژی شەهیدانی یەکێتێ بۆ ئەوە دەگەڕێتەوە كە ئەركی جێبەجێكردنی مەراسیمی تایبەت و شایستە بە شێوەیەكی دادپەروەرانە لە سەرانسەری هەرێمی کوردستان و ناوچە دابڕێنراوەكان بۆ (26) هەزار شەهیدی نەمر لەلایەن ئۆرگانە پەیوەندیدارەكانی یەكێتییەوە بکرێت، چونكە لە توانای راگەیاندنەكەدا نەبوو كە بتوانێت هەموو مەراسیمەكان راستەوخۆ پەخش بكات، بەجۆرێک ئەگەر (٢٦) هەزار دابەشی رۆژەکانی ساڵ بکەین، دەبوایە رۆژانە مەراسیم بۆ یادی زیاتر لە (٧٠) شەهیدی نەمر بکرێت".

راشیگەیاند:"هەموو رۆژێكی ساڵ بۆ یەكێتییەكان هەر رۆژی شەهیدانە، چونكە هیچ رۆژێك تێپەڕ نابێت، كە لەو رۆژەدا هەڤاڵێك یان چەندین هەڤاڵ، هەندێ‌ رۆژیش دەیان هەڤاڵی نەمر، بە گیانی خۆیان شاباشی رزگاری یان نەدابێت, هیچ گوندێك، شاخێك، لوتكەیەك، ئەشكەوتێك، پێدەشتی گەرمیان و كوێستانێكی ئەم وڵاتە نییە قارەمانە نەمرەكانی یەكێتی پەیامی شەهیدستانیان پێنەگەیاندبێت".

دەشڵێت:"هیچ گەڕەك و شەقام و كۆڵانێكی شارەكانی ئەم وڵاتە نەماوە قارەمانەكانی یەكێتی دەیانجار بە خوێنی خۆیان ئاویان نەدابێت ،هیچ زیندانێكی سەردەمی رژێمی بەعسی رووخاو نەمابوو نیشتمانپەروەرەكانی یەكێتی لەبەردەم پەتی سێدارە پەیامی (كەم ژیان و كەڵ ژیان) یان بە گوێچكەی جەلادەكانی ئەو سەردەمە نەگەیاندبێتبۆیە هەموو رۆژێكی ساڵا بۆ یەكێتییەكان و بۆ گەلەكەمان رۆژی شەهیدانە، رۆژی 21/11 یش رۆژی دەربڕینی وەفاو بەڵێن تازەكردنەوەیە بۆ گیانی پاكی شەهیدان كە درێژە بە رێبازە پیرۆزەكەیان بدەین"

PUKMEDIA